11/03/2023 法蘭克福 vs 史特加 - 賽前分析

足球資訊 | 德國甲組足球聯賽(2022/23) | 發布日期: 11/03/2023

排名: 德甲(6) vs 德甲(15)

法蘭克福、史特加今晚將會迎來第100次對決，近7次對賽法蘭克福4勝3和較有優勢。計近況法蘭克福看似牌面唔靚，不過都可以留意番佢哋歇冬後3場勝仗全部喺中下游球隊身上取得，可見跌watt嘅法蘭克福對住低排名對手仍係有一定把握，而客隊排第15嘅史特加就正好係呢類對手。

法蘭克福法蘭克福歇冬後只取得3勝3和2負，排名由第4滑落到第6，確係令人有啲失望。從進攻球員嘅一系列統計數字可以見到：前鋒背後嘅三個核心鐮田大地、Lindström、Götze嘅進攻效率統計數字都喺歇冬後大降，首席前鋒Kolo Muani單計入球數字keep到水準，只不過助攻數量大減。

教練Glasner都明白要面對問題對症下藥，可謂軟硬兼施，例如兩星期前作客輸俾RB萊比錫之後俾球員連放兩日假調整心態，但換嚟係接連作客再賽和排第7嘅禾夫斯堡。另一方面，法蘭克福帶住2個失球下星期作客拿玻里踢歐聯十六強次回合，教練Glasner安排咗一系列特別針對防反嘅訓練俾球員，聽講球員反應都係正面嘅，只可惜Lindström訓練時受傷將會缺陣，加上估計防中隊長Rode有機會輪換留力惡鬥拿玻里，今晚主場都未能以手上最佳陣容迎戰史特加。

史特加長期喺降班區徘徊，前兩週更輸埋俾榜尾兼長期不勝嘅史浩克04，整定要做護級份子。開季頭19場內射入6球嘅中鋒Guirassy自第20週對弗賴堡開始因傷缺陣，同一場亦出現咗另一重大轉變，就係一號門將F.Müller患病由Bredlow取代，點知一改冇回頭，Bredlow自此連續踢咗4場。救火教練Labbadia呢個舉動，較大程度只係用嚟令F.Müller嘅批評者收聲，實際幫助並唔係咁明顯，情況同史浩克04重新起用老將Fährmann即取得2勝4和不能相提並論。比較實際嘅利好消息係左閘Sosa上週對拜仁坐波監，今仗將可以復出。