德甲轉會窗——急需補人的拜仁

足球資訊 | 德國甲組足球聯賽(2022/23) | 發布日期: 28/12/2022

今屆世界盃大贏家非PSG莫屬，若論到大輸家首選則睇怕會係拜仁慕尼黑。拜仁慕尼黑入選世界盃嘅球員本來多達17人係威係勢，但自從Mané未出征就傷出，拜仁嘅世界盃大軍陸續增添傷兵，當中更包括門將Neuer與及後衛Hernández。拜仁嘅德國幫早已因分組賽出局士氣受損，如果還要用殘陣應付歇冬後嘅聯賽，想鞏固領先優勢就變得更為艱難。

拜仁為世界盃亞軍法國隊貢獻4人，而持續有貢獻嘅就只得中堅Upamecano一個。另一後衛Lucas Hernández較早階段已經傷十字韌帶長唞，Pavard打法唔配合好快打俾迪甘斯質入冷宮之餘，又不斷傳出佢對外爆料、影響軍心等負面傳聞，去到決賽則輪到Coman射失十二碼招致大量人身攻擊。當中Lucas Hernández重創對拜仁嚟講係其中一個最實質嘅困擾，儘管陣中另有一位打入四強嘅摩洛哥右閘Mazraoui，佢踢世界盃前嘅聯賽出場次數、表現都未係好俾到人信心，拜仁現時嘅防線可謂危機處處。

拜仁後防同時要面對嘅另一大問題，係門將兼隊長紐亞喺德國隊早早出局後滑雪斷腳，令拜仁完全失去預算。拜仁自2021年7月起就將二號門將Nübel外借俾法甲摩納哥，大家可能以為最簡單咪就係拜仁召回Nübel應急，但其實兩隊之間嘅外借協議冇提到冬窗提早收回嘅條款，換句話講今期拜仁係需要搵摩納哥坐定定去傾有冇可能賣個方便，所以拜仁係處於弱勢。Nübel本來踢史浩克04頗為搶鏡，自從免轉會費改投拜仁後一直不見天日，更好快就要展開外借生涯，Nübel同拜仁嘅關係本來就唔談得上係好，難怪Nübel已推咗拜仁續約到2028嘅offer。另一方面，Nübel喺摩納哥已企穩陣腳，今季更已試過5場clean sheet，摩納哥暫居法甲第6，與第3位其實只差4分，對摩納哥嚟講佢哋當然會想保留原班人馬衝刺，呢一點係就算拜仁願意額外加錢就未必解決得到。如果摩納哥最終斷然拒絕、轉會市場又搵唔到合適人選，拜仁就需要啟動另一後備Ulreich，撐到季尾。