18/12/2022 阿根廷 vs 法國 - 賽前分析

足球資訊 | 世界盃2022 | 發布日期: 18/12/2022

排名: 世界(3) vs 世界(4)

直播資訊: NowTV, ViuTV, NowE

FIFA近年設有「回水」機制，俾國家隊徵召踢世界盃嘅球員按日折現回俾所屬嘅球會（近兩年內效力過嘅球會都有得分）。心水清嘅球迷大概估到今屆世界盃最大贏家會係巴黎聖日耳門，法國隊報計過條數，PSG 會淨袋超過300萬歐羅。除咗八強出局嘅葡萄牙三子同埋巴西嘅Neymar，摩洛哥主將Hakimi亦都踢足7場，今晚上演嘅決賽更不在話下，其中一個焦點就係PSG一對尖刀——阿根廷Messi、法國Mbappe嘅新舊球王對決。今晚任何一方勝出，波衫就可以加印第三粒星。

衛冕冠軍法國打破魔咒成功打入淘汰賽之餘，更一路殺入決賽，係20年嚟首次有國家接連進入決賽，風頭一時無兩，但首先佢哋要解決來自內部嘅不穩定因素。話說法國踢決賽週初期總算克服到「傷」，嚟到四強就輪到要面對「病」嘅打擊，首先四強賽對摩洛哥已經有中堅Upamecano、中場Rabiot因病缺陣，到近日消息陸續浮上水面，據報法國大軍竟然係俾MERS病毒吼中，雖然Upamecano、Rabiot已經復操，但又輪到一對中聖Varane、Konate中招。參考法國最後一場分組賽大輻輪換輸俾突尼西亞嗰場，成班副選睇嚟冇乜建立到默契，如果法國大軍喺呢幾日冇把握時間阻止病毒蔓延同埋俾球員完全康復，不論最終有冇影響到正選組合，都勢將影響法國臨場發揮。

阿根廷踢四強賽輸晒控球同單對單對抗，反而3球大勝克羅地亞，Messi繼續表現搶鏡，喺射入1球兼做出1個助攻後，Messi決賽週以嚟已累積5個入球、3個助攻，其中有3個入球來自十二碼。喺荷蘭教練van Gaal眼中，當對手控球時Messi就會冇影，而沙特阿拉伯嘅法籍教練Renard就似乎睇到更多嘢，佢發現阿根廷防守時Messi嘅工作其實係由右中場De Paul頂咗唔少，進攻時Messi、De Paul二人合作亦係阿根廷嘅煞食招數，因此截斷Messi、De Paul之間嘅聯繫就顯得十分重要。Renard嘅諗法係阿根廷會用番八強贏荷蘭時所排嘅3-5-2陣式，利用兩閘不斷上前施壓，而最終都係交由偏右路嘅Messi發辦。所以法國除咗左邊後面要多加留意Messi之外，更需要走位偏左嘅中場Rabiot多啲回防，實行全方位箝制阿根廷呢位球王。

Renard係今屆決賽週暫時唯一一個擊敗過阿根廷嘅教頭，又係法國同鄉，佢嘅建議無疑幾有參考價值，但前提始終係法國要先確認已解決隊中嘅病患。

分類:

足球資訊

18/12/2022 阿根廷 vs 法國 - 賽前分析

分類:

標籤:

關於我們:

快速連結:

聯絡我們: