15/12/2022 法國 vs 摩洛哥 - 賽前分析

足球資訊 | 世界盃2022 | 發布日期: 15/12/2022

排名: 世界(4) vs 世界(22)

直播資訊: NowE/NOW TV Ch.618/ViuTV

喺世界盃史上，只有兩隊曾經連續兩屆贏冠軍，法國希望能成為第三隊，而Mbappé亦有機會同球王比利一樣，連續兩屆奪冠。不過嚟緊四強呢一關並唔容易，摩洛哥喺淘汰賽階段先後擊敗歐洲班覇西班牙同葡萄牙，亦成為史上第一隊非洲球隊進入四強，戰意高昂。摩洛哥曾經係法國嘅保護國，領隊Regragui生於法國，球員時代主要效力法國球隊，國家隊球員就有五位踢緊法甲，至於隊長Saïss，前鋒Boufal亦喺法國出世。雖然球隊同法國嘅關係咁密切，但由決賽周第一場開始，場內場外都令人感受到佢哋對國家嘅熱愛，特別係賽後球員都被影到同屋企人喺場內肉緊地慶祝，球員自己亦話，為自己國家出戰世界盃感到自豪，所以呢場佢哋一定會搏盡。法國同摩洛哥喺正式比賽曾經對賽五次，最近一次係2007，兩隊賽和2:2。

法國上場憑Tchouaméni遠射，同埋Giroud頭槌，贏英格蘭2:1。法國球員嘅個人技術係好，中前場嘅Mbappé ，Giroud，Dembélé，Griezmann把握力亦毋庸置疑，當火力全面開放時，一有攻勢就有機會入波。不過佢哋防守方面就較弱，睇返上場對英格蘭，遇到對手有技術同速度，Tchouaméni同Theo Hernández就因為禁區內犯規，而輸十二碼。

摩洛哥對葡萄牙時防守緊密而有紀律，反擊亦有效率，相反葡萄牙踢得較急，傳送上都唔到位，就算下半場換入C.Ronaldo都未能改變戰局。Hakimi喺整個決賽周嘅賽事中都表現突出，攔截時清脆，助攻長傳亦好有威脅。摩洛哥防守堅韌，決賽周未被對手射入過一球，唯一一個失球係對加拿大時嘅烏龍波。進攻方面，En-Nesyri上場施展佢驚人嘅彈跳力，頭槌入球嗰下跳出9尺1寸嘅高度，比出名跳頂力強嘅C.Ronaldo跳得更高，佢將會係摩洛哥嘅武器之一。

法國喺星期二進行最後一課操練，未見Upamecano同Rabiot蹤影，傳媒報道佢兩個因為感冒，只能喺室內做輕量訓練，兩個都未知聽日係咪可以踢，而摩洛哥右閘Mazraoui早前傷病已經好返，但前鋒Cheddir今場停賽，兩個正選中堅：Aguerd以及上場傷出嘅Saïss都未必能夠趕及上陣。

分類:

足球資訊

15/12/2022 法國 vs 摩洛哥 - 賽前分析

分類:

標籤:

關於我們:

快速連結:

聯絡我們: