05/12/2022 英格蘭 vs 塞內加爾 - 賽前分析

足球資訊 | 世界盃2022 | 發布日期: 04/12/2022

排名: 世界(5) vs 世界(18)

直播資訊: NowE/NOW TV Ch.618

世界盃史上，英格蘭七次對非洲球隊都不敗(W4 D3)，而且喺所有賽事中，英格蘭對非洲球隊係未輸過(W14 D6)，今次英格蘭同塞內加爾係史上第一次對壘。塞內加爾自從2002首次入世界盃決賽周後，除咗1:0贏法國冇失波，之後十場賽事都有失球。淨睇往績，英格蘭確係贏面高啲，不過淘汰賽係一場定生死，塞內加爾係應屆非洲國家盃冠軍，就算冇咗Mané，分組賽亦贏咗兩場，實力不容忽視。呢場賽事嘅勝方，將會喺八強對法國/波蘭。

對威爾斯時，英格蘭鋒線換上Foden同Rashford兩位今季聯賽狀態甚佳嘅球員，呢場三個入球都由佢哋包辦。上屆世界盃神射手Kane雖然仲係等緊呢屆嘅第一球，但就已經有三個助攻，追平2002世界盃Beckham嘅紀錄，自1966以來，未有英格蘭球員喺大賽交出四個助攻。Kane係必然正選，仲有機會破呢個紀錄。喺其他位置上Southgate要諗吓點樣應對塞內加爾，尤其係兩翼嘅反擊，速度較快嘅Walker可能比Trippier佔優。要破塞內加爾嘅密集，Rashford喺進攻上嘅瓣數多啲，會比Sterling合適。

塞內加爾分組賽最後一場前排第三，必須贏第二嘅厄瓜多爾先可以晉級，佢哋一開始就強攻，上半場已經有12次射門，完半場前，Ismaila Sarr禁區內被撞跌，自己操刀射入十二碼，下半場雖然厄瓜多爾追和，不過分幾鐘後， Kalidou Koulibaly喺罰球混亂中射入，最後2:1擊敗對手。

英格蘭球員對塞內加爾幾個主力，包括Mendy，Sarr，Gueye，Koulibaly都已經好熟悉。喺過去三場分組賽，塞內加爾防守緊密。對荷蘭同厄瓜多爾時，利用 Ismaila Sarr，Boulaye Dia，Bamba Dieng打反擊，以個人突破能力同速度殺入禁區。防守方面，門將Mendy對荷蘭時犯錯，之後兩場就屢救險球，特別係對厄瓜多爾一戰幫球隊保住勝局。Koulibaly同右閘Youssouf Sabaly喺分組賽表現出色，Sabaly攔截成功率更達100%，但面對功力咁強嘅英格蘭，防中Idrissa Gueye又停賽，會係一大考驗。

分類:

足球資訊

05/12/2022 英格蘭 vs 塞內加爾 - 賽前分析

分類:

標籤:

關於我們:

快速連結:

聯絡我們: