21/11/2022 英格蘭 vs 伊朗 - 賽前分析

足球資訊 | 世界盃2022 | 發布日期: 21/11/2022

排名: 世界(5) vs 世界(20)

直播資訊: NowTV, ViuTV, NowE

世界盃前，英國牛津郡有人用自家農場養嘅一隻「靈性」羊駝 - Alfie，預測世界盃B組英格蘭會喺首場輸波。聽落會覺得係爆冷，始終英格蘭上屆世界盃去到四強，去年歐洲國家盃仲入埋決賽，睇個大賽走勢，今次似會摸到隻盃，而且第一場只係對全組世界排名最低嘅「亞洲一哥」伊朗，似乎係無難度，但睇埋英格蘭嘅大賽首場往績，又可能唔同講法。

英格蘭踢世界盃總係慢熱：2002首場和瑞典，雖然2006年以1:0小勝巴拉圭，2010就只能賽和美國，2014輸比意大利，四年前就僅僅補時贏突尼西亞2:1。世界盃外圍賽中，英格蘭以大勇姿態得小組首名，仲係歐洲區外圍賽中，得失球差最好嘅一隊。但近期就跌咗watt，喺歐國聯英格蘭六場未嘗一勝要降班。其實英格蘭人腳，特別係中前場近年人才輩出，冇理由仍創造力欠奉，入球咁少。傳聞待業中嘅Tuchel, Pochettino對英格蘭帥位已經虎視眈眈。

Southgate喺陣式同用人上，雖然一直比人話保守同有自己一套，但好似Maguire同Sterling，就算喺球隊狀態低沉，踢國家隊時反而表現穩定。今場預計仍然會用返大賽時嘅三中堅陣式，再配合殺上去助攻嘅兩閘Shaw, Alexander-Arnold，中間就由Bellingham同Rice一攻一守。Maddison仍然未跟大隊操練，要強攻時仍有Foden同對德國友賽時，後備入替表現突出嘅Saka。

唔計友賽，伊朗喺近三年嘅國際賽事中，只係輸過一場。佢哋入圍世界盃共6次，今年已經係連續第3屆，但以往總係過唔倒分組賽，世界盃史上賽15場只贏過2場 (1998美國，2018摩洛哥)。伊朗嘅組織緊密，擅長快速反擊，唔易應付。不過，近日伊朗嘅反政府示威，有可能影響球員嘅作戰心態。國內體育界要求國家隊退出世界盃，名宿Daei拒絕到場觀戰，前鋒Azmoun就公開支持示威者，更傳伊朗球員會罷唱國歌同入波時唔慶祝。隊長Jahanbakhsh喺賽前記招，被問到國內局勢，顯得有啲唔耐煩，佢話呢個星期，佢哋只會集中精神應付分組賽，希望球隊能首次晉身次圈，為國民帶嚟喜訊。

伊朗嘅入球，主要係幾位喺歐洲搵食嘅球員包辦：波圖Taremi上季聯賽32場入20球同13助攻，今季延續上季嘅狀態，13場已經有6個入球5個助攻；而利華古遜嘅Azmoun喺外圍賽入咗10球，係速度、技術，力量兼備嘅球員。佢哋星期三友賽0:2不敵亦係準備緊世界盃嘅突尼西亞，未有上陣嘅Azmoun，將會趕及星期一傷愈復出對英格蘭。

分類:

足球資訊

21/11/2022 英格蘭 vs 伊朗 - 賽前分析

分類:

標籤:

關於我們:

快速連結:

聯絡我們: