11/12/2022 英格蘭 vs 法國 - 賽前分析

足球資訊 | 世界盃2022 | 發布日期: 10/12/2022

排名: 世界(5) vs 世界(4)

直播資訊: NowE/NOW TV Ch.618

英格蘭今屆世界盃算係順利，淘汰賽階段仍能輕取塞內加爾，不過佢哋八強嘅對手，係上屆冠軍法國。喺世界盃史上，英格蘭同法國對陣兩次，都係英格蘭贏，但近年英格蘭最後一次贏法國已經係七年前嘅友賽。自2006以嚟，法國係唯一隊世界盃冠軍，喺之後嗰屆能夠打入八強，要持續穩定咁取得成績並唔容易。呢兩隊今屆實力上難分高下，兩隊都未必想好似尋日兩場咁，要踢到互射十二碼，事關佢哋去年歐洲國家盃都係輸喺呢個位，咁意味著其中一隊會歷史重演。

法國上一場憑藉Giroud加上Mbappé梅開二度，以3:1踢走波蘭。Mbappé再度施展佢嘅驚人爆炸力，上半場一次喺左邊邊線，以整場最高嘅衝刺時速每小時35.3公里，由自己半場帶波壓過對手，搞到波蘭要出動第二位球員，先清倒佢嘅腳下球。法國喺今屆賽事，有接近一半嘅入球來自傳中，另外有三個入球係頭槌，同英格蘭唔同，佢哋嘅入波主要由Mbappé同Giroud包辦，單係Mbappé已經製造咗5個入球同2個助攻。而中場就要靠Tchouaméni，法國雖然冇咗Kanté，但Tchouaméni表現好穩定，就算對突尼西亞時大輪換，Tchouaméni都有上陣。

英格蘭喺世界盃嘅四場賽事，鋒線都有唔同配搭：Saka、Rashford、Foden輪流搭Kane。喺世界盃佢哋暫時同葡萄牙一樣入咗12球，係今屆賽事最多。除咗呢幾位之外，中場嘅Bellingham可傳可射，對塞內加爾嘅第一二球，佢都有參與。進攻上佢哋唔會有問題，賽前最多人談論嘅，係點樣可以箝制Mbappé，大家都覺得Walker喺經驗，速度同埋身體對抗上，會係最適合嘅人選。雖然法國攻力比塞內加爾強，英媒預計今場Southgate會以對塞內加爾原陣出戰。

Sterling上星期因為屋企被爆竊，返咗英格蘭處理事件，星期五已經返到卡塔爾跟操。Rice早前身體抱恙，休息兩日之後亦已復操。英格蘭今日係full team，而且心理上已經準備好，一旦去到互射十二碼階段，去年射失嘅Saka同撲救十二碼記錄唔錯嘅Pickford，都話有信心會比去年做得更好。而法國嘅最後一課主要練死球戰術，包括防守同進攻時由Griezmann負責處理，以及傳球斷纜時點防止對手打反擊，但就冇練十二碼。

分類:

足球資訊

11/12/2022 英格蘭 vs 法國 - 賽前分析

分類:

標籤:

關於我們:

快速連結:

聯絡我們: