13/05/2023 柏林聯 vs 弗賴堡 - 賽前分析

足球資訊 | 德國甲組足球聯賽(2022/23) | 發布日期: 12/05/2023

排名: 德甲(4) vs 德甲(5)

德甲進入第32週，榜首榜尾都仍然有大把嘢爭，其中第4位嘅柏林聯同第5嘅弗賴堡鬥到難分難解，雙方暫時只能夠憑得失球差分到高下。柏林聯自然希望趁住主場了結對手盡早確認歐聯資格，弗賴堡則礙於餘下賽程場場難打，就算柏林聯主場威力幾勁都好都要盡地一煲。

柏林聯升上德甲一季就有拎到資格踢歐協聯，第二季升呢踢歐霸，球會今季已經錄得破紀錄嘅2千萬歐羅盈利，假如守得住聯賽第4出戰歐聯，單計近1600萬嘅登場錢已經夠晒興奮。但近期柏林聯走勢偏軟，自從德國盃四強輸俾法蘭克福之後5場聯賽只係贏到1場，口痕友問係唔係壓力太大呀？經理Oliver Ruhnert斬釘截鐵咁話就算有都係正面嘅壓力，班球員都明白嚟緊係許勝不許敗。柏林聯呢季主場keep住強勢，至今仍然保持不敗，全個德甲除咗柏林聯就只有拜仁慕尼黑先至做到。

柏林聯、弗賴堡爭歐聯進入最後大直路，雙方嘅德甲贏、輸、和次數完全相同，柏林聯嘅敗仗全部喺作客時發生，弗賴堡則係另一道風景，對住頭3名拜仁、多蒙特、RB萊比錫都係被雙殺，剩低嘅一場敗仗則係歇冬完後首場意外俾禾夫斯堡大炒6蛋。還記得弗賴堡歇冬前最後一場主場大勝柏林聯4:1，聯賽升到上第2位鋒頭一時無兩，可惜係歇冬臨完嘅備戰工作做得唔好導致球員遲遲未上番晒力，及後亦只能喺下游球隊身上有較大嘅取分把握。不禁又令人諗番起上季尾二場波，弗賴堡主場1:4輸俾柏林聯後再輸埋煞科戰對利華古遜，就咁將本來將要到手嘅歐聯席位交番出嚟。

嚟到今季季尾，弗賴堡再次面對艱難賽程，打完柏林聯之後嘅對手禾夫斯堡、法蘭克福都未會咁早放軟手腳，相比起柏林聯只係要面對賀芬咸、雲達不來梅，弗賴堡要爭歐聯位無疑係難度更高。今場弗賴堡更有可能礙於善踢3-5-2嘅主隊強勢而就住轉踢3後衛，幸好係上場因不同原因缺陣嘅翼鋒堂安律、後衛Lienhart、中場Sallai都應該趕及歸隊待命。

預計兩隊正選陣容：

【柏林聯】
Rönnow - Doekhi, Knoche, Diogo Leite - Juranovic, R.Khedira, Roussillon - Laidouni, Haberer - Becker, K.Behrens

【弗賴堡】
Flekken - Kübler, Ginter, Lienhart - Sildillia, M.Eggestein, Höfler, Günter - Höler, Grifo - Gregoritsch