06/05/2023 哈化柏林 vs 史特加 - 賽前分析

足球資訊 | 德國甲組足球聯賽(2022/23) | 發布日期: 06/05/2023

排名: 德甲(15) vs 德甲(18)

主隊近況：LLLLD

客隊近況：LWDDW

對賽往績：哈化柏林勝(2) - 和(2) - 史特加勝(4)

歷來德甲嘅「護級群組」都有唔少隊可以喺生死關頭踢出拼勁，場場搏盡踢番啲爭氣波。榜尾嘅哈化柏林沉淪日久，再call舊臣子Dárdai回巢帶隊暫未見到起色，上星期作客拜仁慕尼黑畏首畏尾踢到得番兩成控球率，換著面對狀態更好嘅拜仁應該唔止輸0:2咁少。而另一邊廂史浩克04、史特加都做出咗成績，尤其係史特加嘅換帥效應極為明顯，名宿漢尼斯姪仔S.Hoeneß上任後史特加連續5場不敗，直至剛剛嘅星期三先至喺德國盃四強以2:3僅僅輸俾法蘭克福，光榮畢業。

哈化柏林前金主Windhorst曾經誇下海口話要將哈化柏林打造成big city club，唔洗幾年就已經變成笑話，球員、教練、管理層換完又換，錢就燒咗好多，換嚟嘅成績就係長期護級，最終都係要賣盤求去。新金主777 Partners本身就係私募基金，來頭唔嘢小，不過佢哋都知隊波要面對嘅係咩景況，球會亦已經同賽會密密斟，傾定假如下季要踢德乙要有咩準備。

講番賽場上嘅成績，哈化柏林進入2023年踢咗15場德甲，就只係有8分進賬，唔覺唔覺就跌到落榜尾。現時哈化起碼要追6分先至有機會踢附加賽，而餘下嘅對手科隆、波琴、禾夫斯堡，哈化都可以話係冇乜把握，情況確係唔樂觀。已經係三進宮嘅Dárdai今次擔任救火教練兩戰兩敗，佢認為呢兩場波同樣缺陣嘅黑山前鋒Jovetic復出，將會係餘下賽程嘅搶分關鍵，此外後防大佬Kempf坐完波監出山，陣容亦有望更為完整。

史特加由S.Hoeneß接掌之後聯賽踢出2勝2和不敗佳績，主場追和多蒙特、贏埋慕遜加柏，作客亦KO護級直接對手波琴，得分比同期嘅拜仁還要多，威到冇朋友。今個禮拜史特加比哈化多踢一場，體育總監Wohlgemuth就認為球員體力唔會係大問題，睇嚟佢會覺得隊波打番起個節奏更為重要。人選方面，預計正選陣容會回歸番去上星期贏慕遜加柏嗰場咁上下，後防大將Mavropanos德國盃四強踢咗半個鐘就因傷退下火線，佢今場如果未能趕及復出，德國盃入替佢嘅Zagadou就需要繼續頂上。