21/05/2023 奧格斯堡 vs 多蒙特 - 賽前分析

足球資訊 | 德國甲組足球聯賽(2022/23) | 發布日期: 19/05/2023

排名: 德甲(13) vs 德甲(2)

德甲好多時會連尾二一輪嘅賽事都會安排喺同一時間進行，務求做到不論係爭標定還是護級都保持到公平嘅比賽環境，唔會出現遲開波嗰隊有得「睇住嚟踢」。受緊密賽程、轉播收益多種因素影響，近年德甲都只能保持到第34週9場同步上演。今季嚟到第33週，相信大家都對於多蒙特只落後拜仁慕尼黑1分感到意外，拜仁今週主場對排第3嘅RB萊比錫，客隊仍有機會跌落第5，戰意就唔洗懷疑，只係對賽成績實在太曳難予厚望（拜仁喺各大賽事近11場不敗，首回合賽和1:1），又如果拜仁星期六贏波而去到星期日多蒙特又失手輸俾奧格斯堡，拜仁球員就唯有在家自隊香檳。

奧格斯堡同拜仁、多蒙特嘅微妙三角關係，焦點在於奧格斯堡39歲少帥Enrico Maaßen身上。Maaßen今季進入奧格斯堡之前，正好就係多蒙特二隊嘅教練，佢亦好老實咁講如果多蒙特最終反超拜仁贏到德甲，佢會十分開心。之但係咁樣唔代表Maaßen就可以放水益多蒙特，事關德甲下游仍然爭持激烈，暫時守住第13嘅奧格斯堡只要有咩冬瓜豆腐，就有機會跌到去第17直接降班，再睇番奧格斯堡餘下嘅賽程，最後一場就算係對住無心戀戰嘅慕遜加柏亦未見得好有把握，所以Maaßen不論係為咗球隊定係為咗自己飯碗，都冇留力餘地。Maaßen亦好識講嘢：今季雙殺利華古遜、兩場對柏林聯豪取4分，更重要係上半季主場贏埋拜仁，都做盡有凸啦。

奧格斯堡近6次主場同多蒙特拉成均勢（2勝2和2負，總入球10:10），除咗大前年失夠5球之外，其餘主場對賽都係一球上落，加上護級要緊，主場嘅奧格斯堡對多蒙特嘅阻力不容輕視。另一方面多蒙特雖然話係排第2，近一個月先後客場賽和第16嘅史特加同埋第15嘅波琴，都令球迷既驚訝又感到可惜，與此同時多蒙特目前嘅作客得失球差竟然係負數（25:27），可以預期今場賽事多蒙特班底有優勢但戰況仍會咬得較緊，呢一點並非聯賽排名可以完全反映得到。

拜仁會長話今場「做到嘢」嘅話，就會送啤酒過去相隔不遠嘅奧格斯堡勞軍，Maaßen今次又妙回：「球員之中唔多人係酒友，但如果拎去請球迷飲嘅話一定會有好多人捧場。」

分類:

足球資訊

21/05/2023 奧格斯堡 vs 多蒙特 - 賽前分析

分類:

標籤:

關於我們:

快速連結:

聯絡我們: