12/02/2023 RB萊比錫 vs 柏林聯 - 賽前分析

足球資訊 | 德國甲組足球聯賽(2022/23) | 發布日期: 11/02/2023

排名: 德甲(4) vs 德甲(2)

拜仁慕尼黑歇冬完後終於贏到禾夫斯堡開齋，否則已經俾四連勝嘅柏林聯取代咗德甲榜首位置，依家第一同第六只差6分，而今晚尾場二哥柏林聯就要作客第四嘅RB萊比錫。柏林聯今季作客成績進一步提升，RB萊比錫就算今季仍係主場不敗都唔可以掉以輕心。

逐個教練去秤得分嘅話，Marco Rose接手以嚟RB聯賽14場狂搶31分，可以算得上係德甲最佳，就算今期前線冇咗Olmo、Nkunku，做唔番沿用嗰種輪換幅度，萊比錫喺入球方面仍係有穩定輸出，直至上星期作客科隆，兩隊只能踢成0:0各執一分，Marco Rose保持到近18場14勝4和冇輸過嘅勢頭，只係終於迎嚟18場以嚟嘅首次0入球。呢場波俾人感覺係技術型嘅RB對住體力化、硬淨打法嘅隊伍較難發揮，今晚番到主場迎戰同樣打硬淨格嘅柏林聯，近況、往績（上季主場輸1:2）都未有明顯優勢嘅RB務必要打醒十二分精神。今場波RB嘅後防人選值得留意，隊長Orbán啱啱捐完幹細胞救人，未知能否恢復得切即刻再上陣，好消息則係長唞半年嘅Klostermann上場對科隆已經踢到全場90分鐘，就算Orbán最終未能上陣都大致keep到隊型。

柏林聯喺冬季轉會窗做咗黃大仙，將右閘主將Ryerson賣俾多蒙特救亡，隨即用更高價喺格拉斯哥流浪補入2022世界盃幫克羅地亞踢滿6場嘅右閘Juranovic。Juranovic嚟到後只係踢過1場聯賽1場盃賽，上兩場聯賽甚至連大軍陣容都不入。此外中場本來已經傾掂西班牙過氣球星Isco，但又勢估唔到最後一刻對方先嚟反價，呢一系列嘅買賣操作暫時未係對柏林聯好有幫助，隊波就依然係咁上，歇冬之後聯賽4戰全勝，連教練Fischer都話19場得39分確係黐線。柏林聯今季唔止靠主場發惡，最新武器係後備火力，話說柏林聯今季已經試過7次由後備球員建功，次數僅低於多蒙特嘅9次。以上場主場對緬恩斯為例，Fischer安排嘅正選前鋒Behrens喺30分鐘入1球，到79分鐘俾客隊追平後即換入Jordan，Jordan落場4分鐘就即刻入波奠勝，呢啲神操作確唔係隊隊能夠做到。