15/10/2022 法蘭克福 vs 利華古遜 - 賽前分析

足球資訊 | 德國甲組足球聯賽(2022/23) | 發布日期: 15/10/2022

排名: 德甲(5) vs 德甲(15)

直播資訊: HKJCTV

今晚德甲法蘭克福主場迎戰利華古遜，雙方同樣在星期三的歐聯比賽敗陣。兩隊德甲對碰74從未出現過0:0賽果，近15次對賽更係全部分到勝負。有見下週中法蘭克福踢德國盃嘅對手只係第五級別聯賽球會，利華古遜更係一早出局可以抖足一個星期，今晚呢場雙方都有本錢放盡嚟踢。

法蘭克福為咗備戰星期三作客熱刺嘅歐聯賽事，上週末輪換兼轉陣踢4-4-2，造就榜尾嘅波琴取得開季9場以嚟嘅第1場勝仗。事先張揚要留力歐聯嘅法蘭克福未有獲得回報，作客熱刺追極都要輸2:3，更慘係中堅老大長谷部誠韌帶撕裂傷出。教練Glasner帶領法蘭克福嚟到第2季始終念念不忘自己玩開嘅4後衛但同樣觸礁，最近嘅止血方法不外乎認低威轉番踢3後衛，兼重新起用38歲嘅長谷部誠穩定後防。今次長谷部誠長抖無疑係一大損失，只能寄望Tuta、Ndicka等後生嘅後防喺習慣番3後衛打法後保持到隊型。前鋒Kolo Muani今季加盟法蘭克福後入球唔多，但keep到有助攻，繼上星期聯賽停賽後作客熱刺亦只係踢咗70分鐘，今場應可以再以正選姿態上陣。

利華古遜上個週末換帥喜逢史浩克04，大勝4:0一度令大家對新教練Xabi Alonso抱有希望，點知星期三主場即刻整一場0:3輸俾波圖，瞬即打回原形。現實就係利華古遜聯賽開季以嚟只有兩勝排第15，球隊後防失波過多之餘亦需要時間重新適應Xabi Alonso嘅4-3-3打法。好消息係歐戰停賽嘅Andrich、Frimpong重返中場，利華今晚套正選陣容已算係近期嘅full team。

踢球者預計兩隊正選陣容：
【法蘭克福】
Trapp - Tuta, Jakic, Ndicka - Dina Ebimbe, Kamada, Sow, C. Lenz - Lindström, M. Götze - Kolo Muani
【利華古遜】
Hradecky - Tapsoba, Tah, Hincapie - Frimpong, C. Aranguiz, Andrich, Bakker - Diaby, Hudson-Odoi – Schick