30/01/2023 利華古遜 vs 多蒙特 - 賽前分析

足球資訊 | 德國甲組足球聯賽(2022/23) | 發布日期: 29/01/2023

排名: 德甲(8) vs 德甲(5)

球賽方向: 讓球利華古遜[0]

利華古遜開季表現插水，隨住球員適應新帥打法兼有主將復出，歇冬後已經做出兩戰兩勝，符合外界嘅期望。利華今晚主場擺下擂台恭候多7分、高3位嘅多蒙特，終於有一套較完整嘅陣容踢番場硬仗。

利華古遜前半季進攻上最大問題就係中場冇咗最有天份嘅Wirtz，連帶中鋒Schick以至其餘前鋒都欠缺供應導致入球量不足，入球數比上季同期少咗足足10球。Xabi Alonso上任至今帶領利華古遜踢咗9場比賽，頭4場只贏到1場，面對RB萊比錫、法蘭克福嘅硬仗更係輸晒。Xabi Alonso初期打算先穩住防守而選用3-4-3踢法，到球隊後防穩定落嚟後先締造到歇冬前後5連勝。等到依家進攻核心Wirtz全面復出，Xabi Alonso當前要務就係要識得點樣釋放出Wirtz嘅進攻天份。

喺早前嘅熱身賽以至上一輪主場贏波琴2:0嘅正賽，Wirtz已經先後領教過Xabi Alonso嘅4-2-3-1以至4-3-3，務求做到唔同陣式之下都發揮到Wirtz嘅功用。利華古遜今場能否開足火力，則要留意前鋒位置嘅最終人選。已經做咗3個月嘅「十字軍」Schick今場有望重返後備席，但不宜抱過大期望。8日內踢3場嘅利華古遜如要踢輪換嘅話，上場有入波嘅Hlozek較大機會收起，先由翼鋒Aldi打頭陣。

至於需要5日內接連踢兩場作客嘅多蒙特，上場對緬恩斯一如所料未能即刻搵番穩定性，更係開波兩分鐘即告失手，要去到臨完場至由Reyna入波反勝，同再上一場對奧格斯堡一樣驚險十足。Reyna喺呢兩場都擔當後備殺手取得入球，同主隊一樣8日3戰嘅多蒙特大有機會安排佢今晚踢正選，配合放波監嘅Bellingham，希望可以為多蒙特條中場線增添動力。

預計兩隊正選陣容：

【利華古遜】
Hradecky - Tapsoba, Tah, Hincapie - Frimpong, Palacios, Andrich, Bakker - Diaby, Wirtz, Adli

【多蒙特】
Kobel - Ryerson, Süle, N.Schlotterbeck, Guerreiro - Can - Adeyemi, Brandt, Bellingham, Reyna - Moukoko