27/05/2023 科隆 vs 拜仁慕尼黑 - 賽前分析

足球資訊 | 德國甲組足球聯賽(2022/23) | 發布日期: 27/05/2023

排名: 德甲(10) vs 德甲(2)

上星期奧格斯堡對多蒙特開局一如所料，多蒙特未能搶得甜頭，如果唔係奧格斯堡40分鐘已經開始踢少個，多蒙特都未必射到成3:0。至於前一日出現嘅更驚人賽果就實在無話可說，臨場活力唔多足夠嘅拜仁慕尼黑主場首次輸俾RB萊比錫，將聯賽爭標嘅主動權讓晒俾多蒙特。而為萊比錫射入追平一球嘅奧地利中場Laimer下季轉投拜仁已係公開秘密，但Laimer其實只係拜仁前教練Nagelsmann落order要買嘅人……拜仁今季一系列嘅騎呢怪事堆砌出今季德甲令人啼笑皆非嘅終章，要作客贏科隆唔係難事，只係贏到之餘還要寄望另一邊多蒙特不勝，拜仁先至可以再一次反超衝線。

Tuchel嚟到拜仁之後嘅聯賽成績係5勝1和2負，同期多蒙特喺Terzic領軍之下都只係5勝2和1負僅多1分，Tuchel係慘在首戰大勝多蒙特之後德國盃即刻出局、歐聯八強遇上大勇嘅曼城無奈要執包袱，嚟到尾二一場聯賽又將辛苦搶回嘅頭位再次讓出，堪稱地獄黑仔王。拜迷大可以話拜仁今年開季已經賣咗Lewandowski、過完世界盃又傷咗隊長Neuer、後防大將Hernández，最近期又冇埋左閘Davies……不過唔好忘記，Nagelsmann落鑊前聯賽只係剛剛落後多蒙特1分，歐聯方面更係8戰8勝，當睇見分組賽俾拜仁雙殺嘅國際米蘭打到入決賽，真係唔知拜仁一班高層有咩想法。

拜仁高層當然會兜，重申炒Nagelsmann係長線考慮，目光要放長遠啲……小道消息傳緊拜仁會斟離巢冇耐嘅前CFO Jan-Christian Dreesen回歸坐埋上CEO個位、取代引發拜仁自爆嘅元凶之一Oliver Kahn，同時間小道消息亦話Tuchel唔洗孭鑊，高層會為佢大開水喉，四出搶人才去幫手遮掩高層所犯嘅過失。

回頭再睇今個週末嘅煞科日賽事，科隆就算次席射手Tigges因傷缺陣又如何呢？隔離多蒙特只要主場擊敗排第9嘅緬恩斯，拜仁呢邊就算順利贏波都係嘥氣。而且今場將會係科隆隊長Hector掛靴前嘅告別戰，就算科隆近年對賽往績有幾差都唔可以輕視佢哋今場爭勝歡送隊長嘅決心。