米蘭雙雄每季意甲都起碼碰頭兩次，但歐洲賽場對賽次數就唔算多，歐聯改制以嚟只係踢過5場（2003年四強、2005年八強）。今季雙方對賽次數算係多，意甲聯賽雙方各贏一場，意大利超級盃決賽國米大勝3:0，歐聯四強已完成嘅首回合國米亦都係輕取2:0先拔頭籌，AC米蘭論近況論人腳都處於下風，再追番首回合嘅兩個失球並唔容易。

國際米蘭意甲開季一度跌到落第9，嚟到目前已升到上第3，又打入咗意大利盃決賽，歐聯更係踢緊四強，要奪得來季嘅歐聯席位機會越嚟越大。只係喺人事上，國米喺備戰下季方面仍有唔少變數，例如教練Simone Inzaghi喺驚濤駭浪之下將隊波帶番上歐聯區，本應加晒分有得提前續約，點知國米總經理Marotta就只係好hea咁講咗句「我哋對Simone好滿意，但要討論將來嘅安排我哋仍然有好多時間。」認真hurt爆。

就算AC唔係首回合輸0:2，球隊本身都面對緊唔少問題，佢哋自從三月起就好似失去晒所有活力，意甲頭四亦都不保，想要下屆踢歐聯佢地需要喺餘下嘅3場之中追番至少4分，否則只要今晚出局就差唔多篤定下季歐霸見。自從首回合就因傷缺陣嘅葡萄牙翼鋒Rafael Leão復出在望，教練Pioli放晒風話Leão今場好大機會趕及復出，成事嘅話36歲法國中鋒Giroud可望唔洗孤軍作戰。

 

預計兩隊正選陣容：

【國際米蘭】
A. Onana - Darmian, Acerbi, Bastoni - Dumfries, Brozovic, Dimarco - Barella, Mkhitaryan - Dzeko, Martinez

【AC米蘭】
Maignan - Calabria, Kjaer, Tomori, Theo - Krunic, Tonali - Saelemaekers, Brahim Diaz, Rafael Leao - Giroud