歐聯鬥到最後一輪，D組局勢仍然混亂，熱刺，士砵亭，法蘭克福同馬賽，四隊都有機會晉級。

 

熱刺而家係分組榜首，以兩分領先馬賽，今場邊隊贏，就可以晉級。上星期對士砵亭，熱刺喺95分鐘有一個具爭議性嘅越位球，VAR判入球無效，最後只能以1:1主場賽和士砵亭。而聯賽上星期六喺先失2球嘅情況下，補時階段以3:2絕殺般尼茅夫。領隊Conte 剛接任熱刺一年，因為上場領紅，呢場生死戰，佢只能喺觀眾席搖控球隊。Conte令熱刺球員嘅體能同精神面貌有所改變，佢雖然喺祖雲達斯，車路士，國際米蘭都贏過聯賽冠軍，但佢帶隊嘅歐聯成績總係八強止步，而且5次踢歐聯，只有3次係可以喺分組賽晉級。

 

馬賽而家係聯賽榜第五，但近況欠佳，近6場賽事，只贏過1場。上場聯賽喺領先2球下，被斯特拉斯堡追和2:2。今場曼聯借將Bailly預計會傷癒復出，佢嘅速度同埋豐富經驗，將能鞏固馬賽後防。馬賽部份現役球員同阿仙奴關係密切，包括前球員Sánchez, Guendouzi, Kolašinac，而Nuno Tavares就係今季借將。其中以Sánchez最具威脅，今季聯賽10場入4球，歐聯踢4場入2球。Sánchez話，佢一直心繫阿仙奴，每次擊敗熱刺都令佢好開心。呢場許勝不許敗嘅賽事，相信佢會特別落力。

 

馬賽喺歐聯對英超球隊嘅往績就唔多好，過去9場賽事都未贏過(D2 L7)，最後一次贏波已經係2010年。但熱刺作客法甲球隊往績亦好差(D4 L2)。首回合熱刺憑藉Richarlison入2球主場2:0贏馬賽，呢場Richarlison繼續養傷，前鋒線仍然係靠Kane同Son。

 

歐協官網預計兩隊正選陣容：

馬賽

Pau López - Balerdi, Mbemba, Kolašinac - Clauss, Rongier, Veretout, Nuno Tavares - Guendouzi, Harit; Alexis Sánchez

 

熱刺

Lloris - Romero, Dier, Davies - Emerson, Bentancur, Højbjerg, Perišić - Moura, Kane, Son