車路士喺對多蒙特歐聯關鍵一戰前，以Fofana一個頭槌，終止咗佢哋近3場全敗同395分鐘冇入球嘅紀錄。賽前有傳Potter帥位危在旦夕，呢場聯賽同星期二嘅歐聯，會係Potter嘅最後機會。保命嘅第一關過咗，第二關亦唔容易，因為對手多蒙特近況大勇，所有賽事十連勝，喺德甲已經追到同拜仁同分，只得失球較差排第二，佢哋係歐洲頂級聯賽中，唯一一隊2023年全勝嘅球隊。對上一次多蒙特連勝8場，係2011/12球季，當年Klopp帶領球隊贏咗聯賽冠軍。

 

多蒙特雖然聯賽連續5場作客都贏波，亦只係失咗2球，但自2020年底開始，佢哋歐聯作客都未試過保持清白之身返德國，近5場作客倫敦球會更全軍覆沒。首回合雖然主場，但形勢比客隊差，只憑Adeyemi一個反擊，扭過門將射入，但佢早前肌肉受傷，未有隨隊去倫敦。正選門將Kobel，上場聯賽熱身時拉傷大腿肌肉，亦未知係咪能夠上陣。多蒙特老總Watzke亦提醒球員，唔好因為車路士嘅聯賽排名而鬆懈，始終過去八個月花咗六億歐羅增兵，佢哋隨時可以喺場上展示球隊實力。

 

多蒙特歇冬後防守有改善，好大原因係中場主要用雙防中Özcan拍Emre Can，喺球隊進攻，兩閘出擊之時，其中一個會補返兩中堅中間嘅空位，另一個就會企喺防線前面作最後屏障。對車路士首回合，就係靠防守意識強嘅Emre Can喺白界線前清咗門將擋出嘅Koulibaly射門。當fit嘅佢，上星期五聯賽對萊比錫時禁區外一個遠射，幫助球隊最後贏2:1。多蒙特攻守平衡，歸功於一眾球員，都會參與進攻同防守，為球隊而戰。

 

車路士近13場都未試過入2球或以上，作客多蒙特，雖然有8次中龍射門，都未有進帳，就算對列斯聯有入波，都係憑後防嘅頭槌，可見佢哋攻擊力頗為疲弱。呢場Mount停賽，但James週末休息一場之後，肌肉已經復原並全面復操，再加上Pulisic亦傷癒復出，攻力會有所增強。佢哋陣中歐聯經驗最豐富嘅係Sterling，由利物浦時代起，佢出戰過80場歐聯，共入咗26球同有24個助攻，只差4個入球就能夠平Rooney 嘅紀錄。鋒線當然仲有首回合射門中楣嘅João Félix，佢話呢場球隊充滿信心。領隊Potter就謹慎啲，認為最後勝負可能要由互射十二碼決定，所以已經準備好，當然仍希望可以喺法定時間內贏波晉級。