歐聯十六強上演戲碼，利物浦同皇馬繼2018決賽，2021八強，2022決賽又再碰頭，果然係冤家路窄。皇馬剛贏咗世界冠軍球會盃，登上世界之巔，但本土聯賽方面， 喺世界盃之後成績輕微滑落，而家以5分落後榜首嘅巴塞隆那，但踢少一場。利物浦就沉咗半季，近半個月開始復甦，戰意提升，進攻同防守亦有改善，加上晏飛路嘅主場氣勢，要復仇亦唔係冇機會。不過，踢波有時係格食格，皇馬可以話係利物浦嘅剋星，近年喺歐聯遇親皇馬都冇運行，一場都冇贏過，對上一次歐聯贏皇馬，已經係2008/09 Benítez年代嘅歐聯十六強。

 

Modrić話利物浦嘅聯賽成績，令佢覺得有啲意外，但以利物浦嘅實力，隨時可以喺聯賽榜上返嚟。佢又講得冇錯，經過打吡戰贏愛華頓，再之後贏紐卡素各2:0，利物浦而家只係距離前四7分，而且比前四嘅球隊踢少1-2場。隨著傷兵Jota, Van Dijk, Firmino復出，冬季轉會窗先嚟嘅Gakpo，同Núñez，Salah進攻時開始互相配合，兩閘亦再交出有威脅嘅助攻，喺近兩場聯賽，球員嘅精神面貌明顯唔同，對利物浦嚟講，呢場歐聯算係時間岩岩好。

 

皇馬就剛剛喺星期六作客奧沙辛拿，Benzema養傷，Tchouaméni同Kroos都因病缺席。面對奧沙辛拿嘅壓迫踢法，佢哋只能靠長傳比Vinícius Jr作快速反擊。下半場Vinícius Jr左邊傳中比後上嘅Valverde射入佢近4場嘅第4球，補時階段Asensio再入1球，以2:0埋單。上年歐聯決賽一箭定江山嘅Vinícius Jr，今季各項賽事已經入咗16球，同Benzema並列隊中神射手。佢擅長喺左邊以速度同技術扭過對方球員，同上場決賽一樣，仍然係對利物浦嘅一大威脅。

 

利物浦上場聯賽Núñez撞傷膊頭，雖然尋日有參與操練，Klopp話要再睇吓佢嘅情況。皇馬Benzema上星期對艾爾切時受傷，剛剛復操，趕及出戰，但兩個正選中場Kroos同Tchouaméni因病未有隨隊，中場控球搶截能力會有影響，Ancelotti就話唔擔心，反而考慮緊會穩守定強攻，認為今次係兩個回合，踢法同去年決賽唔同，而且需要踢180分鐘好波，先有機會出線。