直至上星期，拿玻里先至首次同AC米蘭喺歐聯賽場上碰頭，結果拿玻里繼意甲大敗0:4後再輸一場0:1。今晚兩隊係一個月之內第三度碰頭，雙方都面對攻力疲弱嘅問題。拿玻里可以賴早前冇咗神射手Osimhen，而AC米蘭近個半月以嚟唔計聯賽大炒拿玻里嘅話，就已經有5場只射入到1球，情況睇嚟更令人擔憂。

拿玻里意甲聯賽主場俾AC米蘭大炒4:0嘅時候，主隊球迷抗議門票漲價等新措施，茅頭直指向班主兼主席Aurelio de Laurent。喺歐聯八強次回合之前嘅一個週末，做咗若干輪換嘅拿玻里主場喺擁有八成控球率之下，只能以0:0賽和排尾三嘅維羅納，值得留意係拿玻里自從去年九月起就已經未試過和波。

呢場波唯一值得拿玻里慶祝嘅就係Osimhen能夠以後備身份復出。呢位24歲嘅尼日利亞中鋒今季已經喺意甲、歐聯29場波之中射入25球，而喺佢缺陣嘅3場波之中，就正正包括咗對AC米蘭嘅兩場。嚟緊第3次對戰AC，教練Spalletti會將Osimhen放番入正選陣容，希望藉次解決近期冇乜波入嘅苦惱。

意甲已經踢咗30輪比賽，拿玻里喺聯賽榜帶足一條街，上屆冠軍AC米蘭位處梗頸四之餘更已經落後拿玻里22分，AC米蘭最近一排入球數字偏少，喺大炒拿玻里之後意甲、歐聯3場波夾埋只入得兩球，上星期六亦係喺換晒10個outfield player正選之下賽和排名第8嘅博洛尼亞（1:1）。AC米蘭當然想複製十六強對熱刺嘅劇本，兩回合只入一球就淘汰對手（主場1:0、作客0:0），但拿玻里已經有Osimhen歸位，攻擊力應會比熱刺更強。

 

預計兩隊正選陣容：

【拿玻里】
Meret - di Lorenzo, Juan Jesus, Rrahmani, Olivera - Lobotka - Elmas, Zielinski - Lozano, Kvaratskhelia - Osimhen

【AC米蘭】
Maignan - Calabria, Tomori, Kjaer, Theo - Krunic, Tonali - Brahim Diaz, Bennacer, Rafael Leao - Giroud

相關內容:

---