上季歐聯分組賽係德甲RB萊比錫同英超曼城首次對碰，RB萊比錫首循環作客曼城輸到3:6，番到主場都可以贏2:1。今季兩隊即刻又再相遇，又如果連同RB教練Marco Rose嘅履歷都計算在內，則已經係連續3年互撼。

英超方面賽程頻密，上星期三曼城作客榜首嘅阿仙奴全取3分，爭標形勢本來稍見好轉，但去到星期六繼續作客面對排第14嘅諾定咸森林，就出現咗控球比例7:3、球角次數10:0而最終比數卻係1:1嘅意外賽果。神鋒Haaland二月以嚟踢4場只得1個入球1個助攻，火力係加盟曼城以嚟嘅最低點。曼城教練Guardiola唔死抱昔日常勝方程式4-3-3而試改踢3-2-4-1，本意係好，但經歷森林一役之後，De Bruyne、Laporte、Stones亦因傷病避戰，睇怕都要先球穩陣踢番球員較為熟悉嘅4-3-3。

Haaland嚟到曼城之前，先後喺薩爾斯堡紅牛、多蒙特跟隨過Marco Rose搵食，就算Haaland回勇，現已成為萊比錫教練嘅Rose都應該有一定嘅揸拿。Rose已經唔係第一次打曼城：喺2020/21球季，Rose帶住慕遜加柏殺入十六強主客同樣輸0:2俾曼城出局，咁近期嘅經驗配合手頭上更好嘅人腳，萊比錫理應要把握主場之利踢一場有所交代嘅首回合賽事，唯一要留意嘅係球員狀態。上星期六RB萊比錫作客聯賽排名稍低嘅禾夫斯堡，因為領先1:0後遲遲未能拉開紀錄，禾夫斯堡亦一早換人變陣反撲，RB原班人馬撐到尾段先有得陸續換人，最終大勝3:0並未能反映主力球員嘅負荷。另一方面RB皇牌前鋒Nkunku喺呢場復出踢咗20分鐘，Rose喺記者會承認Nkunku未完全ready，莫講正選打曼城冇乜可能，就連後備上陣搏殺都要臨場再權衡下先能做決定。

---

預計兩隊正選陣容：

【RB萊比錫】
Blaswich – Klostermann, Orban, Gvardiol, Raum – Laimer, Schlager – Szoboszlai, Forsberg, Werner – Silva

【曼城】
Ederson - Akanji, Ruben Dias, Aké - Rodrigo, Bernardo Silva - Mahrez, Foden, Gündogan, Grealish - Haalan