Potter帶領球隊殺入歐聯八強，最後都難逃被炒嘅厄運。喺老闆仲未搵到星級領隊接手前，Lampard走馬上任，帶領球隊到季尾。佢回歸嘅第一場聯賽已經遭遇滑鐵盧，第二場就要硬撼應屆冠軍，喺十六強淘汰利物浦嘅皇家馬德里。Ancelotti同Lampard，對上兩任嘅愛華頓領隊，當年喺車路士一個係領隊一個係球員，將會開展兩回合嘅生死戰。兩隊對上兩季都有碰頭，2020/21四強車路士兩回合贏3:1，上季八強皇馬加時以5:4驚險晉級，呢兩季贏嗰隊之後都長驅直進捧盃而回。

 

一直傳聞嘅車路士新領隊，都係有番咁上下級數。老闆嘅目標係要贏今季歐聯，所以Lampard壓力都唔細。經過幾場看似復甦之後，車路士又再陷入入球荒，已經三場聯賽0入球。當然佢哋嘅鋒線上仍有好多選擇，睇下Lampard會唔會試吓唔同嘅組合。今個球季已經冇嘢好爭，球員如果能夠展現爭標決心，話唔定Lampard又會步2012 Di Matteo後塵，以看守領隊身份贏歐聯。呢場Thiago Silva同Mount有望復出。上場休戰嘅Kante，雖然近期受傷患困擾，Lampard相信傷患唔會影響佢嘅表現。而Thiago Silva養傷兩個月，今個星期開始復操，佢兩個嘅復出，將會加強球隊防首穩定性。

 

皇馬今季喺聯賽成績麻麻，但Ancelotti懶理有關換帥嘅傳聞，週中西班牙盃四強以4:0贏巴塞隆拿，到星期六收起幾個主力備戰歐聯就出事，比維拉利爾反勝3:2，而家同榜首巴塞隆拿差距13分，只領先第三嘅馬體會2分。唔少人認為Ancelotti係盃賽專家，盃賽成績比聯賽突出，帶住咁有大賽經驗嘅皇馬，作客利物浦用咗唔夠四十鐘就完全扭轉局勢，由輸0:2到贏5:2。Ancelotti認為剛剛聯賽敗戰，只係球員欠缺爭勝心，唔會影響佢哋備戰歐聯。剛喺夏季以自由身轉會嘅Rüdiger，坦言希望歐聯抽倒對車路士。佢2021年曾經幫車路士捧走歐聯，而前領隊Lampard在任時佢就不被重用。只離隊幾個月，佢話車路士雖然變化好大，但仍然有好多頂級球員，呢場唔易應付。

 

被問到會唔會考慮再執教車路士，Ancelotti話希望Lampard能夠帶領球隊得到好成績。Ancelotti執教嘅2009/10球季，車路士贏咗英超、足總盃雙料冠軍，佢仍然好愛車路士，但呢兩場賽事當然唔會放軟手腳。

 

相關內容:

---