曼城、國際米蘭首次喺歐聯碰頭，就已經係今場嘅決賽大戰。比賽地點伊斯坦堡阿塔圖克奧林匹克體育場原定係2020年決賽場地，因遇著疫情一再延期，直至今年先至成功補辦。講到伊斯坦堡，英超迷應該唔會陌生，呢個場上一次亦係第一次主辦歐聯決賽同樣由英超球隊對意甲球隊，當時利物浦上演驚天大逆轉，喺上半場已落後3球之下連追AC米蘭3球，最後射十二碼贏埋「大耳盃」。反觀今年決賽，英超代表曼城氣勢正盛，無疑係奪冠熱門。

曼城自從獲阿布扎比財團入主，再請埋名牌教練Guardiola，早已成為英超冠軍常客，歐聯亦已經連續參加到第12季，然而冠軍從未到手確係有啲遺憾，前年終於首次進入決賽同車路士合演英超打比，面對早年試過向自己虛心求教嘅Tuchel，Guardiola忽然戰術大師上身變打法呃完人再呃埋自己，最終僅負0:1可謂恨錯難返。

今季曼城英超一直緊隨阿仙奴，最後一個月從後趕上再贏一季，剛剛亦擊敗埋曼聯贏得足總盃冠軍，三冠目標已有兩冠到手，而王朝最後一塊拼圖亦看似在望。曼城今季歐聯頭12場踢出霸氣，除咗7勝5和不敗之餘，途中先後大勝新鮮出爐歐霸冠軍西維爾（4:0）、RB萊比錫（7:0）、拜仁慕尼黑（3:0）、以至衛冕冠軍皇家馬德里（4:0），足以令所有對手聞風喪膽。曼城今年火力大開與挪威神鋒Haaland加盟不無關係，Haaland之前喺薩爾斯堡紅牛、多蒙特一直保持歐聯超高入球效率，今季轉投曼城即時上力，歐聯踢10場即入夠一打，平均更係只需踢63分鐘就入到1球，絕對係國際米蘭嘅惡夢。此外，荷蘭中堅Aké養傷3星期後已經復出，曼城喺防守人選方面有更多選擇，只要Guardiola唔好再故佈疑陣玩謝自己友，三冠王美夢將有好大機會實現。

國際米蘭聯賽先苦後甜，季尾踢出7勝1負保住個意甲第3，盃賽方面則有啲運仔，繼歐聯四強淘汰同市宿敵AC米蘭，及後又已經喺意大利盃決賽擊敗費倫天拿，為歐聯決賽一壯行色。國際米蘭上一次喺摩連奴帶領下殺入2010年歐聯決賽，擊敗拜仁慕尼黑捧盃之餘同季更完成三冠偉業，不過好快就進入十年寒冬，直至近年先至喺聯賽、本土盃賽再做番贏家。阿根廷前鋒L.Martínez歐聯入球頻率冇喺意甲咁高效，但踢足12場射入3球之餘亦送出3個助攻，有佢在陣不論係夥拍借將Lukaku抑或老將Dzeko，都能夠keep到一定嘅威脅。