08/04/2023 利華古遜 vs 法蘭克福 - 賽前分析

足球資訊 | 德國甲組足球聯賽(2022/23) | 發布日期: 08/04/2023

排名: 德甲(7) vs 德甲(6)

利華古遜、法蘭克福喺德甲對賽75次都未試過0:0，呢個紀錄冠絕德甲，場場有波入亦係球迷之福。今場第27週嘅比賽係利華古遜踢主場，佢哋已經連續7場對法蘭克福主勝，心理上佔盡優勢，聯賽榜方面亦受惠於近期4勝1和嘅不敗佳績，追到只落後法蘭克福僅僅1分。

利華古遜近個半月喺聯賽、歐霸共取得7勝1和佳績，雖然對手大多唔係強隊，但單計贏到拜仁呢一場就已經夠贏晒口碑。利華古遜一直苦候中鋒Schick全面復出，無奈Schick後備身份踢咗3場之後又再傷過，教練Xabi Alonso玩到將Wirtz移前填咗個正中鋒位竟然收到奇效。記者問到係唔係諗緊衝番上第四趕搭歐聯尾班車？Wirtz即刻叫大家貼番地先，要逐步逐步嚟。

利華古遜今季德國盃早早出局，但歐霸闖到入八強，高層無疑係想再進一步。以賽程嚟講，利華古遜完成對法蘭克福嘅聯賽後5日，會留喺主場踢歐霸，對手聖基萊斯聯現時喺比甲排第2，不論賽程、牌面上利華都唔需要喺聯賽格外留力，只要擊敗法蘭克福，就更可以超越對方，相信利華古遜今場可以先排出最強陣容迎戰。

法蘭克福歇冬完後經歷低潮，聯賽由最高位第2跌到去依家嘅第6，歐聯十六強更係連吞拿玻里五蛋出局。法蘭克福喺歐聯出局後一直摸索，直至近一星期似乎終於搵到最佳嘅正選組合，呢套陣容喺第26週賽和波琴之後，再喺德國盃八強淘汰柏林聯，報番兩星期前聯賽輸波之仇。但教練Glasner作風係唔玩輪換，佢搵到呢套陣容踢順咗就未必肯換正選，假如Glasner真係用同一套陣9日內踢3場波，不論體能以至戰術執行上都會稍為秤低。

預計兩隊正選陣容：

【利華古遜】
Hradecky - Kossounou, Tah, Tapsoba - Frimpong, Hincapie - Andrich, Palacios - Diaby, Wirtz, Adli

【法蘭克福】
Trapp - Jakic, Hasebe, Ndicka - Buta, Rode, Sow, Max - Borré, M. Götze - Kolo Muani