20/03/2023 利華古遜 vs 拜仁慕尼黑 - 賽前分析

足球資訊 | 德國甲組足球聯賽(2022/23) | 發布日期: 17/03/2023

排名: 德甲(9) vs 德甲(1)

利華古遜近年主場對住拜仁慕尼黑毫無優勢可言，上季更慘遭血洗5:1。今場係拜仁舊部Xabi Alonso執教利華以嚟首次面對拜仁，考慮到對賽往績（近6場聯賽1和5負）以至球員近況，怕且Xabi Alonso都唔敢奢望今場有得喺拜仁身上攞威。

利華古遜歇冬後嘅狀態一度俾到大家希望，進攻主力Wirtz、Schick先後復出亦令人以為從此可以發力狂追，可惜踢出嚟始終欠穩，聯賽只能喺面對排名較低嘅對手時有把握。喺呢兩個禮拜週中都要踢歐霸盃十六強，中間夾住場作客雲達不來梅嘅聯賽，利華古遜一出唔齊全副主力就立即製造險情，先失1球之下只能險勝3:2完場，賽後唔少評論都認為雲達理應保到1分，論身價論級數利華古遜踢到咁係有啲醜怪。

喺今晚對拜仁之前，利華古遜苦苦掙扎都仍然卡喺第9位，距離有得踢歐洲賽嘅第6名仍爭6分，長遠嚟講佢哋想繼續追係仍然有機，但睇嚟亦唔急於即刻要喺拜仁身上搏殺搶分，加上剛經歷完歐霸盃十六強次回合，所以就算過埋今晚就會進入國際賽假期，利華古遜恐怕仍需要因應球員狀態而做些少輪換，以1分為目標照計係今場較理性嘅方針。

3週前先至話榜首3隊同分，3週後拜仁慕尼黑又已經拉開第3嘅RB萊比錫7分，可見拜仁依然keep到啲韌勁。拜仁進入4月同多蒙特踢一場榜首大戰之後，聯賽真係稱得上硬仗嘅比賽就已經要數到5月尾對RB萊比錫，呢條爭標大直路無疑對拜仁十分有利，拜仁教練Nagelsmann亦開始夠膽頂住質疑聲音，繼續試練佢所認為最適合拜仁人腳嘅3後衛陣式。今晚作客嘅拜仁休息、備戰時間比主隊還要多，喺人手充足嘅情況下大可以出盡全力踢好場波然後放假。