03/02/2024 拜仁慕尼黑 vs 慕遜加柏

足球資訊 | 德國甲組足球聯賽(2023/24) | 發布日期: 03/02/2024

排名: 德甲(2) vs 德甲(12)

直播資訊: Now 639, NowE

慕遜加柏上場擺明車馬死守，令榜首利華古遜喺主場取得75%控球權、射門28次、xG高達2.99球嘅絕對優勢之下顆粒無收。今晚連續第二場作客，對手輪到排第二嘅拜仁慕尼黑，慕遜加柏大可以故技重施，問題在於對手換著係今季累積入球數字仍然多過利華嘅拜仁，慕遜加柏再擺鐵桶又有冇可能再創奇蹟？

名宿夏文已經公開批評，「拜仁x杜曹」呢pair係自十幾年前「拜仁x奇連士文」以嚟最爛嘅一次組合，夏文講得咁狠又唔係錯得晒，杜曹凡事理念先行，打法唔合心意嘅甘美治已失去非賣品嘅地位，只係轉會操作上唔爭氣，買唔到真正防中之餘亦令甘美治今季表現患得患失。中場未能發揮甘美治都算，杜曹近期更難以服眾係寧願起用多蒙特年代嘅舊部拉菲爾古里路（Raphaël Guerreiro）從閘位移入中場，都唔考慮先出哥列斯卡（Leon Goretzka），呢個舉動同樣引來唔少批評。到今期輪到甘美治都傷埋，連帶亞洲盃非洲盃抽走唔少正選（右閘馬斯拉奧代表嘅摩洛哥已經喺非洲盃四強出局，佢本人則帶傷歸隊）、冬窗引援級數又唔算好高，更有京士利高文上場作客奧格斯堡重創長唞，而杜曹嘅應對就係請西甲護級分子格蘭納達開綠燈，俾同一位置嘅Bryan Zaragoza先以外借方式提早半年報到。年僅22歲嘅Zaragoza出名係盤扭怪，俾格蘭納達球迷稱做「魔鬼」，據講杜曹就係喜歡佢好扭，但呢種踢法到底啱唔啱拜仁，照計都好難預期今晚會搵到答案。

拜仁用殘陣捱過低潮期，喺近年嚟講唔係新鮮事。要趁下星期對戰利華之前儲足分數，拜仁嘅動力都係有嘅。若論剩低可用嘅拜仁球員，要排一個合理嘅正選陣容亦勉強可以，只係入面有幾多個係杜曹想用嘅人就難講啲。之前兩場拜仁嘅表現已經見到啲端倪：贏波唔係唔得，但就唔好預乜嘢水銀瀉地、踢出氣勢。另一方面慕遜加柏「901」成功玩到利華古遜一次，雲達不來梅爆大冷作客贏拜仁亦只係兩週前嘅事，慕遜加柏放低包袱嘗試搞局亦未嘗不可。

預計兩隊正選陣容：

【拜仁慕尼黑】
Neuer - Boey, Dier, de Ligt, Davies - Pavlovic - Goretzka, Guerreiro - L.Sané, Musiala - Kane

【慕遜加柏】
Nicolas - Scally, Friedrich, Elvedi - Weigl - Honorat, Koné, Reitz, Netz - Plea - Jordan