04/12/2023 利華古遜 vs 多蒙特

足球資訊 | 德國甲組足球聯賽(2023/24) | 發布日期: 03/12/2023

排名: 德甲(1) vs 德甲(4)

直播資訊: Now 639, NowE

多蒙特近年對利華古遜嘅優勢係幾明顯：聯賽近5次對賽贏夠4次、上季主客雙殺利華古遜之餘更要係零封對手。不過今季利華踢到曉飛，不經不覺已經係三大賽事夾埋連勝14場，今季更係每場波最少入兩球。多蒙特聯賽低利華古遜3位，但就已經係10分嘅距離。

多蒙特上星期贏慕遜加柏終結聯賽兩連敗嘅頹勢，星期二又以接近full team嘅正選陣客作客贏埋AC米蘭，喺死亡F組意外地成為首先確定出線嘅隊伍，球隊進攻靈魂白蘭特（Julian Brandt）臨尾有得踢十分鐘保持比賽感覺。多蒙特呢場波已經有幫隊中嘅進攻主力留力，只係萬萬估不到偏偏個時候病魔來襲，中後場奧斯簡（Salih Özcan）、蘇尼（Niklas Süle）、賓斯拜尼（Ramy Bensebaini）都因病缺席操練，後兩者照計係正選人物，暫時未知佢哋能否趕及上陣，但多蒙特嘅戰鬥力已經係打咗個問號。

利華古遜當初歐霸盃抽完籤之後梗係O晒嘴，客場要去勻挪威、瑞典、阿塞拜疆，都差唔多去勻晒歐協版圖嘅天涯海角，但又點估得到3場客場踢晒之後利華係造出5場全勝15分嘅絕大優勢。利華比多蒙特踢遲兩日，又要勞師動眾飛到去冰天雪地嘅瑞典，係好在積分上嘅優勢令佢哋可以選擇輪換，例如將有輕傷嘅進攻靈魂穫斯（Florian Wirtz）留喺德國，最終利華半力出擊就已經喺客場拎晒3分番屋企。場上更傳嚟好消息：前前後後傷足一年嘅中鋒舒希克（Patrik Schick）落場10分鐘就取得入球。舒希克保持到身體健康嘅話，佢同今年新簽嘅邦尼菲斯（Victor Boniface）將可以為球隊帶嚟更多可能。