21/01/2024 RB萊比錫 vs 利華古遜

足球資訊 | 德國甲組足球聯賽(2023/24) | 發布日期: 20/01/2024

排名: 德甲(4) vs 德甲(1)

直播資訊: Now 639, NowE

拜仁慕尼黑早前因大雪延期嘅比賽要等到下週中先至補踢，利華古遜於是係帶住多踢1場多4分嘅優勢進入下半季。利華喺歇冬後嘅第一場作客換帥後回勇嘅奧格斯堡踢得極之唔穩定，臨完場上演絕殺絕對係行運行到腳趾尾。呢場波利華教練沙比阿朗素兵行險著，先唔派有輕傷嘅穫斯（Florian Wirtz）上場，同時將已經累積4張黃牌嘅中堅莊拿芬達（Jonathan Tah）堅持收喺後備席唔出，為嘅就係緊接落嚟嘅第二場作客硬仗。以賽果論沙比當然係賭贏咗，但呢場波亦可以睇到當舒希克（Patrik Schick）不在狀態再冇埋穫斯喺場上施展魔法，成隊波即時冇厘銳氣。畢竟非洲盃先至剛開鑼，再加上邦尼菲斯不幸重傷預計要唞到四月，利華嘅考驗其實只係剛剛開始。

主隊RB萊比錫外借前鋒添姆雲拿到熱刺之後，上場意外地輸俾歇冬期間大舉增兵嘅法蘭克福。加上科士堡較早前已經離隊，前鋒選擇將更為捉襟見肘。一般估計今場為求穩陣會以經驗行先，尤素夫保臣（Yussuf Poulsen）有望取代20歲仔錫斯高（Benjamin Sesko）嘅正選位置，輔助聯賽已入11球嘅奧賓達（Loïs Openda）搵食。萊比錫前鋒選擇係少咗，但整體嚟講人腳點都係齊整過客隊，主力球員除咗中場阿馬度希達拉（非洲盃）、隊長中堅奧班（膝傷康復中）之外都可以候命。