07/04/2024 多蒙特 vs 史特加

足球資訊 | 德國甲組足球聯賽(2023/24) | 發布日期: 06/04/2024

排名: 德甲(4) vs 德甲(3)

直播資訊: Now 639, NowE

2024年嘅多蒙特唔聲唔聲，聯賽已經造出8勝2和1負佳績，喺第23週輸俾賀芬咸後造出4連勝，上星期更係10年以嚟首次喺拜仁慕尼黑主場全取3分，對上一次已經數到高普帶隊嘅年代。

多蒙特作客贏埋拜仁，可以話係好多場外因素作怪：拜仁開始無心戀戰（教練杜曹賽後恭賀利華古遜，變相宣佈放棄爭標）、上星期德國隊除咗前鋒富高洛（Niclas Füllkrug）之外就冇徵召多蒙特球員打賽，半隊主力知恥近乎勇之餘，比對手多咗休息時間亦確係好實在嘅優勢。如果講遠些少，新一年多蒙特嘅後防已經穩健好多，平均每場失球低於0.7，就算盛傳考慮季尾退役嘅曉姆斯（Mats Hummels）落場次數、時數開始減少，有佢傍住尼高舒洛達碧克（Nico Schlotterbeck）、蘇尼（Niklas Süle）呢個「中堅三選二套餐」已經俾到教練泰錫一定信心。多蒙特今場亦有中場沙比薩（Marcel Sabitzer）、翼鋒馬倫（Donyell Malen）、門將高保（Gregor Kobel）復出。

史特加未能把握多蒙特上星期呢份賀禮，本來大有機會追到只落後拜仁1分，竟然喺領先海登咸之下失魂一度倒輸，連續8場不敗嘅勢頭幾乎就此斷纜，最終要靠新獲得國家隊喼帽嘅安達夫（Deniz Undav）喺補時追平3:3同多蒙特保持4分距離。史特加今季靠射入23球嘅古拉斯（Serhou Guirassy）與及15球嘅安達夫呢對前鋒係咁入波，一舉升上如今第三嘅位置，今季暫時二人合共射入38球亦打破咗球隊喺奇連士文年代嘅封塵紀錄，但係二人同時入波嘅次數去到下半季已經大減，自歇冬前對奧格斯堡兩人各入一粒之後，直至對海登咸先可以再見到兩個前鋒同場發威。此外，今晚史特加中堅位置又要迎來變數，頂替提前收咧嘅薩加度嘅羅奧特繼續養傷之餘，隊長安頓亦已儲夠黃牌停賽，推斷後備中堅欠缺分量嘅史特加需要改踢三後衛。