26/08/2023 波琴 vs 多蒙特

足球資訊 | 德國甲組足球聯賽(2023/24) | 發布日期: 26/08/2023

直播資訊: Now 639, NowE

波琴開季前參加德國盃一場玩完，互射十二碼輸俾已經跌到落丙組嘅比勒費爾德。教練列治喺保留踢三個後衛之下將一班正選球員大玩「乾坤大撕移」，換晒位踢第一場聯賽點知輸得更甘，俾史特加大炒五蛋，身高1米95嘅中鋒菲臘賀夫曼（Philipp Hofmann）更係踢完上半場已被換走，認真洩氣。賽後體育總監Patrick Fabian只係話史特加各方面都較佳，無意怪責球隊太多，睇嚟都係預咗限米煮限飯，想複製上季主場偷雞摸和多蒙特（兼間接令多蒙特錯失聯賽冠軍），睇嚟都已經唔係易事。

多蒙特上季最後一場自己跌番個冠軍出嚟，今季加速世代交替，本來嘅正副隊長萊斯（Marco Reus）、曉姆斯（Mats Hummels）交出隊長章，改由29歲嘅安利簡（Emre Can）揸旗。唔講唔覺，上季安利簡數據好靚，不論平均傳球次數、傳球成功率、單對單成功率都喺德甲中場之中排三甲，只係上場拍住新加盟嘅沙比薩（Marcel Sabitzer）踢double 6就唔多順，連帶成個中前場都拖泥帶水，面對硬淨爛打嘅科隆最終只能小勝一球可以話係毫不意外，就連呢場波出任左閘嘅賓斯拜尼（Ramy Bensebaini）亦都乏善足陳，畢竟已離隊拉菲爾古里路（Raphaël Guerreiro）一直係左路台柱，遇著本來踢多蒙特嘅右翼衛柏斯歷克（Felix Passlack）轉投波琴立即佔據右中場，多蒙特整體能否靠級數上嘅差距再贏一場、把握賽程優勢全取9分（下星期作客升班馬海登咸）加快隊波嘅入局進程，都幾值得球迷留意。