14/12/2023 多蒙特 vs 巴黎聖日耳門

足球資訊 | 歐洲聯賽冠軍盃(2023/24) | 發布日期: 13/12/2023

排名: 德甲(5) vs 法甲(1)

直播資訊: Now 643, NowE

對於巴黎聖日耳門嚟講，佢哋喺歐聯F組嘅前景仍未係好明朗，另一邊紐卡素對AC米蘭如果分到勝負，而PSG作客多蒙特又失分嘅話，PSG就好大機會跌咗落小組第三打歐霸，呢個係塔爾金主入主以嚟從未遇過嘅景況。PSG教練安歷基都咪話唔驚。

參考番PSG前5場「僅有」嘅兩場勝仗（當中包括主場2:0贏多蒙特），會發現兩場嘅正選名單係100%一樣，嚟到最後一場分組比賽，安歷基就算信邪亦已經100%冇可能砌得番同一個陣容，事關踢過多蒙特嘅右翼奧斯文丹比利（Ousmane Dembélé）要坐波監。中場方面，薩伊安美爾（Warren Zaïre-Emery）擺脫重傷疑雲，喺上星期六對南特嘅法甲聯賽復出踢咗30分鐘，對於有望保得住薩伊安美爾、烏加迪（Manuel Ugarte）、域天拿（Vitinha）呢條平均年齡低於21歲嘅三人中場線，安歷基應該會安心些少。

多蒙特近期寫多咗，但都好坦白唔係好捉摸到佢哋飄忽不定嘅表現：當以為佢哋作客利華古遜一定處於下風，偏偏係先入波嘅一方，輪到主場對RB萊比錫諗住有優勢，曉姆斯（Mats Hummels）硬接單刀早早領紅又改變晒場波嘅走向。曉姆斯話晒係前任副隊長，出事後佢確認球證係判禁區外犯規之後，就同球證握握手自行離場，賽後亦都出post安撫球迷情緒，有晒大佬風範。開季前有傳教練泰錫想安排曉姆斯淡出退居二線，心有不甘嘅曉姆斯就用超fit嘅狀態爭取番泰錫嘅信任，今場有佢lead住隊波希望會補足到防中兼隊長安利簡停賽帶嚟嘅缺口。榜首嘅多蒙特賽前仍有3分優勢，假如多蒙特一如所料派番主力出賽，面對相對心急嘅PSG係仍有謀定而後動嘅本錢。

預計兩隊正選陣容：

【多蒙特】
Kobel - M. Wolf, Hummels, N.Schlotterbeck, Bensebaini - Sabitzer, Özcan - Reus, Brandt, Bynoe-Gittens - Füllkrug

【巴黎聖日耳門】
G.Donnarumma - Hakimi, Marquinhos, Skriniar, Hernandez - Ugarte - Zaire-Emery, Vitinha - Barcola, K.-I. Lee - Mbappé

分類:

足球資訊

14/12/2023 多蒙特 vs 巴黎聖日耳門

分類:

標籤:

關於我們:

快速連結:

聯絡我們: