18/04/2024 拜仁慕尼黑 vs 阿仙奴

足球資訊 | 歐洲聯賽冠軍盃(2023/24) | 發布日期: 17/04/2024

排名: 德甲(2) vs 英超(2)

阿仙奴同拜仁慕尼黑，喺歐聯八強次回合前，兩隊個勢強弱逆轉。阿仙奴狀態下滑聯賽全失三分，爭冠之路失去主導權，而拜仁喺德甲贏波，雖然聯賽宣告為冕失敗，但就可以專心歐聯戰線。首回合兩隊上演咗一場緊湊又具爭議性嘅賽事，阿仙奴嘅中堅加比爾(Gabriel Magalhães)龍門前犯手球，賽後杜曹話球證表示，呢啲幼稚嘅錯誤喺歐聯大賽係唔會吹罰。完場前，沙卡(Bukayo Saka)同紐亞(Manuel Neuer)禁區內出現碰撞，阿仙奴要求十二碼不果，最後賽和2:2，兩個判決都引來球迷熱烈討論。

返到聯賽，拜仁雖然2:0贏科隆，但利華古遜就令佢哋11年冠告終。早早放低心理包袱，反而係好事，主場全力出擊。拜仁喺最近十八次淘汰賽階段首回合不敗之下，有十七次最後都能晉級，亦已近十四場歐洲賽主場不敗。呢仗拜仁會面臨小傷停潮：上場歐聯入波嘅基拿比(Serge Gnabry)因肌肉受傷避戰，對科隆時高文(Kingsley Coman）又傷出，左閘阿方素戴維斯(Alphonso Davies)今場停賽。今仗將會靠暫列歐洲金靴獎榜首嘅哈利簡尼(Harry Kane) 強攻阿仙奴，佢今季歐聯已經有7個入球同3個助攻。

阿仙奴上場放虎歸山，未有利用主場優勢，作客慕尼黑將會困難重重。上星期日利物浦對水晶宮輸波，但自己又唔爭氣，主場對維拉被前領隊艾瑪利雙殺0:2。受制於維拉嘅壓迫，比賽尾段谷得太前，被奧利屈堅斯(Ollie Watkins)快速反擊射成2:0。聯賽自爆，早前嘅銅牆鐵壁同入球show近兩場都未再出現。後防連番犯錯，部份球員，例如奧迪哥特(Martin Ødegaard)同沙卡輕傷或出現疲態，都影響整體表現。

拜仁自2020捧走歐聯之後，已經連續三季八強出局，而阿仙奴自2009起未再晋級歐聯四強，亦未喺歐聯淘汰階段贏過拜仁。拜仁作為歐聯老手，加上主場往績唔錯，可以睇高一線。