05/10/2023 紐卡素 vs 巴黎聖日耳門

足球資訊 | 歐洲聯賽冠軍盃(2023/24) | 發布日期: 03/10/2023

排名: 英超(8) vs 法甲(5)

紐卡素為迎接廿年來首場歐聯賽事，星期一晚就喺球場上空舉行咗一場燈光show，用燈光打出「我們回來了」(We’re back)。紐卡素高調回歸歐聯，可能令大家諗起兩隊喺歐洲球壇嘅成功，同球會背景嘅關係，而呢場正正係被稱為「油王打吡」：紐卡素背後有沙地資金支持，巴黎聖日耳門(PSG)嘅資金就來自卡塔爾。

紐卡素已經連續五場未失球，先後作客8:0贏錫菲聯，聯賽杯主場淘汰曼城，而歐聯首場作客聖西路，亦能穩守0:0，大家又再見返上季表現平穩嘅紐卡素。除咗防守穩健，進攻流𣈱度亦比開季時有所改善。查比亞(Kieran Trippier)近兩場有4個助攻，阿米朗(Miguel Almirón)重拾射門鞋，朗史達夫(Sean Longstaff)再成為中場發電機。朗史達夫認為喺球迷嘅熱烈支持下，聖占士公園嘅主場氣勢，將會一時冇兩，希望能夠同利物浦歐聯主場一樣，將主場球迷嘅支持變成場上動力，壓逼對手，令對方冇喘息機會。

至於PSG，今季由安歷基(Luis Enrique)接手，美斯(Lionel Messi)、尼瑪(Neymar)各散東西，射手麥巴比(Kylian Mbappé)季前亦醞釀離隊，結果未有參與季前操練。佢今季上陣七場，有8個入球，但狀態同上季仲有點距離，喺早前對陣馬賽時亦受輕傷，上場對榜尾球隊克萊蒙特時未有進帳，只能賽和0:0。同紐卡素一樣，PSG亦有個攻擊力強勁嘅右閘：夏基美(Achraf Hakimi)近五場已經入3球，亦有1個助攻，佢同麥巴比合作無間，值得大家留意。