皇家馬德里「銀河艦隊」個花名係就係out out哋，不過佢哋球隊上下嘅動向確係仍然對成個球壇有舉重輕重嘅作用：皇馬同教練安察洛堤提前續約，巴西迷可能會有啲失望，但與此同時利華古遜球迷就因此而鬆一口氣。當教練位置確定埋，皇馬接落嚟就要番手處理同麥巴比（Kylian Mbappé）糾纏不清嘅關係。

高普喺十一月時已經話，齋計落場成效嘅話又點會唔考慮撬麥巴比嚟利物浦丫，但邊會夠錢？（雖則今期忽然又話利物浦會積極一試）哥迪奧拿喺半年前亦曾經講得好白：「係人都知麥巴比想去邊」（斷估佢唔係講緊曼城，亦唔係錢多得滯又隨時ready發功嘅沙特聯賽）。就係呢，當大家都認定麥總想去皇馬（更有傳雙方係有過口頭協議），但去年暑假巴黎聖日耳門威逼利誘，麥巴比無奈留低踢咗頭半季。現時已踏入2024年1月，「麥總」同PSG嘅合約已經進入最後半年，佢可以正式同任何有意簽佢嘅球會講數，甚至已經可以草簽合約，但亦因為操作上同今期轉會窗冇關係，即係就算今期麥巴比已經做咗離隊決定，只要各方都有默契唔出聲嘅話，大可以吊大家嘅癮吊到季尾。

皇馬會長佩雷斯喺麥巴比呢件事上可以話係洗濕咗個頭。一方面，佩雷斯始終認定麥巴比舉世無雙，「注定食皇馬飯」，另一方面，事先張揚嘅「預訂」免簽大計已經衰咗一半，皇馬球迷對於呢場鬧劇感到煩厭，皇馬繼續死纏爛打都未必係好事。皇馬今期學精，做咗幾手準備：從巴甲彭美拉斯預訂好17歲已做咗巴西大國腳嘅中鋒Endrick（下季加盟）、放風話皇馬唔再係非要麥巴比不可、然後，一踏入1月立即接觸麥巴比再問多次有冇興趣過檔。皇馬喉舌報章馬卡報今次又爆料，指皇馬開價維持喺除稅淨年薪2600萬歐羅另加億三簽字費。雖然都將會破晒皇馬球員紀錄，但對於皇馬高層嚟講呢個價已經係「忍咗手」：參考今季買比寧咸（Jude Bellingham）嘅經驗，佢會因為競賽原因拒絕來自英超更好嘅offer而選擇皇馬，而且一報到就已經帶領球隊喺世界頂級前鋒缺席嘅情況下保到聯賽半程冠軍+歐聯分組賽6戰全勝嘅佳績，有呢一系列良好示範擺喺眼前，今鋪佩雷斯真係要同比寧咸講多幾次thank you先掂。題外話：大家覺唔覺今期忽然又有人吹風皇馬寧願嘗試改搵夏蘭特（Erling Haaland）呢？

至於巴黎方面，麥巴比續約與否大家又有好唔同嘅解讀。歐聯分組賽最後一場僅和多蒙特，麥巴比嘅表情反應似乎話俾大家知佢會認為呢隊PSG仍未夠班爭歐聯，但與此同時，路邊社亦有傳麥巴比同PSG老細Al-Khelaïfi有番計傾。PSG對於挽留「麥總」嘅信心確係越來越大，所以佢哋都寧願封口，留番啲空間俾「麥總」做決定。

相關內容:

---