皇家馬德里喺一月嘅西甲絕跡兩個幾星期，期間佢哋接連踢咗西班牙國王盃第三圈，與及西班牙超級盃四強、決賽，其中決賽大勝宿敵巴塞隆拿4:1，中場比寧咸（Jude Bellingham）第7分鐘就已經送出助攻俾前鋒雲尼奧斯祖利亞（Vinicius Junior）打開紀錄，可以話係提前將球賽放入雪櫃。

比寧咸到呢一刻都仍未夠21歲，但新加盟皇馬嘅開季成績已經耀眼到不得了。以較早前截至第15週嘅統計數字嚟講，比寧咸14個入球已經打破咗C朗、超級名宿迪史堤芬奴共同保持嘅舊紀錄。計xG嘅話就更加誇張，話說比寧咸同期嘅xG「只係」5.3，但結果係佢已經入夠11球，足足入多咗一倍。當數到嚟最近期，比寧咸今季轉會皇馬以嚟踢咗各項賽事24場，已經取得17個入球（全隊第1）、6個助攻（全隊第2），完美地填補咗賓施馬離隊造成嘅入球產源空缺。（前一個星期都已經有提過，皇馬正好可以利用比寧咸呢盤靚數加強同麥巴比談判嘅本錢）

皇馬固然係受惠者，再問落去：「咁英格蘭呢？」喺2022年世界盃開始前我哋已經提醒大家要留意比寧咸，而佢亦不負眾望好快喺英格蘭穩佔咗一席位。如今嚟到歐國盃年，比寧咸已經一躍成為英格蘭不可或缺嘅成員，有佢嘅致命傳送同助攻能力，喺越嚟越講求穩陣（甚至去到有啲保守）嘅英格蘭中場更有可能已經book定中場裡面僅有嘅主攻名額，而且唔好忘記比寧咸剛剛先至從德甲多蒙特離開，嚟緊去番德國踢歐國盃對於比寧咸嚟講自然又多咗種親切感。

 

相關內容:

---