英格蘭足總盃第五圈，衛冕嘅曼聯主場迎戰富咸爭入八強。曼聯近況低迷，周中主場打少個嘅情況下，從葉士域自身上取得寶貴3分，球隊士氣提升。喺足總盃之路，曼聯擊敗雲尼斯達萊嘅李斯特城晉級，富咸就淘汰韋根。

 

曼聯贏李斯特城2:1呢場波充滿戲劇性同爭議性。致勝入球出現喺補時階段，由越位嘅麥佳亞(Harry Maguire)頭槌頂入。第四圈未有VAR推翻球證判決，賽後李斯特城領隊「雲佬」非常失望，認為球隊唔係輸俾「費格遜時間」而係「越位時間」。周中聯賽對葉士域治，同一對進攻組合又再炮製入球，麥佳亞頂入般奴費南迪斯(Bruno Fernandes)嘅角球奠定勝局贏3:2。

 

般奴費南迪斯近十一場足總盃賽事，入咗7球亦有4個助攻。曼聯最近所有賽事嘅6個入球，全部嚟自佢嘅死球，包括葉士域治嘅烏龍波。生波未送到個波入網，死球就成為近期曼聯嘅秘密武器。呢場足總盃除咗原有嘅傷兵之外，杜古(Patrick Dorgu)周中領紅要面臨停賽。

 

同麥佳亞一樣，富咸嘅箭頭蒙尼斯(Rodrigo Muniz)喺足總盃上圈對韋根入球淘汰對手晉級，周中聯賽對狼隊亦係憑佢嘅入波令富咸全取3分，近五場所有賽事四勝。富咸近期嘅作客成績唔錯，近四場作客賽事全勝，近七場作客各入2球。傷兵方面，史密夫路(Emile Smith Rowe)喺上場聯賽對水晶宮時受傷，未知能否上陣。

 

今季聯賽兩循環，曼聯都係以1:0擊敗富咸。富咸作客時展示咗足夠嘅火力，加上今季曼聯主場未見優勢，自12月1日起，主場都未能保住清白之身，衞冕足總盃之路並唔容易。