足總盃八強兼雙紅會，將喺奥脱福爭奪四強一席出戰溫布萊。呢場對兩隊同樣重要，曼聯排聯賽榜第六，距離第四嘅維拉8分，聯賽爭冠機會渺茫，今季最後一個捧盃機會必定全力以赴。晉級之路遇上頑強嘅攔路虎，剛剛喺歐霸兩回合，大勝布拉格斯巴達11:2，仍然向四冠之路邁進嘅利物浦。

 

曼聯近六次對利物浦，四次未能攻破大門，而且只係贏過一次，和一同輸四，但去年12月作客晏飛路就有水準之作。以嚴密而有紀律嘅防守，令利物浦破咗英超自2016年以來單場攻門次數最多但零入球嘅尷尬紀錄，並成功封殺利物浦嘅34次射門，呢場亦係攻力強勁嘅利物浦今季唯一被零封嘅一仗。主場就一直都係曼聯嘅盃賽福地，自2015年3月起，佢哋喺足總盃嘅90分鐘內未曾輸過俾對手。利物浦喺奥脱福嘅足總盃紀錄就較失色，近六次作客輸咗五次。

 

高普認為聯賽主場和曼聯一仗，球隊表現比開季時有進步，只係賽果未能反映。至於係咪會沿用上場踢法，佢話今次曼聯有一整個星期休息，踢法可能有變，戰術上需要隨機應變。上星期聯賽中堅干拿迪(Ibrahima Konaté)傷出，仍未正式復操，未必能趕及上陣。近期傷癒復出嘅沙拿(Mohamed Salah)歐霸踢足全場，兼且貢獻咗1個入球3個助攻。佢職業生涯對戰曼聯十三場入咗12球，曼聯回防速度慢，要特別小心利物浦嘅快速反擊。

 

曼聯鋒線上賽前傳來好消息，受傷前狀態大勇，連續六場取得入球嘅海倫(Rasmus Højlund)復出。華舒福(Marcus Rashford)對曼城時一腳世界波，對愛華頓又射入十二碼，呢場兩球十二碼都係由最活躍嘅加拿曹(Alejandro Garnacho) 搏返黎，鐵三角將再度出擊強攻對手。除咗長期養傷嘅球員之外，右閘雲比沙卡(Aaron Wan-Bissaka)同中堅哈利麥佳亞(Harry Maguire)有機會復出，後防會有更多選擇。

相關內容:

---