英超賽季第一個錦標，聯賽盃將會喺星期日出爐。利物浦係聯賽盃班霸，曾經九次封王，而對上一次就係擊敗星期日嘅對手車路士。車路士就曾經捧盃五次，最後兩次決賽都係互射十二碼敗於曼城同利物浦。今季兩隊兩次對碰，季初賽和1:1，三星期前利物浦就喺晏飛路以壓倒性姿態贏4:1。呢場大敗之後，車路士重拾正軌，盃賽聯賽連勝兩場，再和曼城，而利物浦亦近三場全勝。兩隊近期對碰，戰情都十分緊湊，近八場有七場都係和局收場，兩年前兩個盃賽決賽都鬥到難分難解，聯賽盃更具戲劇性：加時換入嘅門將艾烈沙巴拿加(Kepa Arrizabalaga) 喺突然死亡階段射失十二碼，將冠軍拱手相讓比利物浦。

 

今日嘅利物浦，因為傷兵滿營以致陣容不整。三星期前以速率控制對手，全場壓迫嘅踢法，隨著幾個主力養傷，恐怕難以延續。艾力臣(Alisson), 阿諾(Trent Alexander-Arnold), 迪奧高祖達(Diogo Jota), 蘇保斯拿爾(Dominik Szoboszlai), 居迪斯鍾𣂷(Curtis Jones)最少要三月底先至能夠復出，而達雲紐尼斯(Darwin Núñez)同沙拿(Mohamed Salah)亦帶傷，上陣成疑。冇左半隊主力，周中對盧頓就只能用逼選同新仔，實力同球員嘅默契大受影響，上半場就先失一球，幸好下半場以氣勢壓贏對手，反勝4:1。嚟緊嘅決賽，陣容仍然天殘地缺，同兩年前決賽一樣，會由射入最後一輪十二碼，協助球隊捧走聯賽盃嘅基拿靴(Caoimhín Kelleher)把守最後一關。

 

車路士上星期作客曼城，上半場已經三番四次策動快速反擊，只欠埋門一腳，終於喺上半場尾段由尼古拉斯積遜(Nicolas Jackson)突破越位右路傳中比史達寧(Raheem Sterling)先開記錄。下半場車路士加強防守，收起攻擊球員之後，久守必失下最終被逼和1:1。普哲天奴話對球隊表現感到自豪，更開心嘅係踢出士氣波，相信要擊敗世上第二強嘅利物浦係有可能。佢認為球隊從失敗中學習，填補咗上半季嘅漏洞，球員喺場上多咗溝通，佢形容而家球隊好似喺決賽前甦酲咗，突然開竅。呢場車路士陣容跟上星期對曼城冇乜大改變，泰亞高斯華(Thiago Silva)仍未完全康復，未有跟操。

相關內容:

---