2023/24球季利華古遜橫掃德甲、德國盃，因此超級盃第二個名額過戶俾德甲亞軍史特加，不論戲碼以至場地，都係德超盃自2010年復辦以嚟嘅新元素。兩隊上季喺聯賽、盃賽多次碰頭都交出好戲，今場估計都會係咬得好緊，話唔定會出現自2017年以嚟嘅首次90分鐘不分勝負直入互射十二碼（德超盃不設加時）。

史特加俾S.漢尼斯教到護級組變歐聯組，上季更係趁拜仁慕尼黑內亂一舉衝到上亞軍位置，自然成為列強垂涎嘅目標。S.漢尼斯推到拜仁嘅邀請，但中堅伊藤洋輝就冇咁「聽話」過咗檔，此外前鋒古拉斯甚至隊長安頓都拉隊轉投多蒙特，一度令史特加嘅陣容面對空前危機。史特加睇嚟都係擔心內部不穩，終於下定決心以破球會紀錄嘅轉會費斟掂白禮頓，將本來租借期滿要歸隊嘅另一前鋒安達夫（Deniz Undav）留番喺史特加，總算keep得番上季彈起嘅安達夫、富列治（Chris Führich）、米圖斯特（Maximilian Mittelstädt）三線組合，加上出其不意地撬走咗奧格斯堡隊長兼首席射手迪米諾域（Ermedin Demirovic），嚟緊安達夫、迪米諾域嘅組合係值得期待嘅。不過史特加後防始終經歷大執位仍有待觀察，加上今場史特加未必即刻放晒安達夫、富列治、米圖斯特落場，需慎防史特加嚟到呢場仍處於試陣狀態。

氣勢一時無兩嘅利華古遜留得住教練沙比阿朗素，奪冠功臣費林邦（Jeremie Frimpong）亦「意外留隊」，暫時比較大嘅損失就只有租借期滿俾拜仁回收嘅右後衛史坦尼錫，本應值得慶幸，但季前熱身賽先有作客阿仙奴大敗1:4，後來主場亦只能與貝迪斯賽和1:1，沙比阿朗素都承認有啲擔心球員狀態未谷番起。此外三個主力後衛莊拿芬達（Jonathan Tah）、塔蘇巴（Edmond Tapsoba）、軒卡比（Piero Hincapié）都分別有球會招手或者表態想走，喺塵埃落定前隊中或會隱藏住不穩定因素。今場阿根廷防中柏拉斯奧斯有傷倦勤，不妨留意由西甲奇兵基羅納轉會過嚟嘅阿歷斯加西亞（Aleix García）會否有機會亮相。

 

 

預計兩隊正選陣容：

【利華古遜】
Hradecky - Tapsoba, Tah, Hincapie - Frimpong, Xhaka, Andrich, Grimaldo - Adli, Boniface, Wirtz

【史特加】
Nübel - Stenzel, Rouault, Chabot, Krätzig - Karazor, Stiller - Silas, Diehl - Woltemade - Demirovic

 

相關內容:

---