第80屆德國盃決賽按照傳統安排喺柏林舉行，今屆決賽係由衛冕冠軍RB萊比錫對戰上屆歐霸冠軍法蘭克福。兩隊都有前場進攻要員盛傳離隊，而兩隊嘅體育總監都有傳成為咗拜仁慕尼黑同一職位嘅候選人，令呢場冠軍戰彷如演變成兩大高層嘅「見工戰」。

法蘭克福歇冬後一度升上聯賽榜第2位，及後大幅回落，歐聯晉級十六強又遇上最終贏咗意甲嘅拿玻里，出局後喺聯賽維持頹勢，直至第31週都仍處於第9。冇諗到劇情峰迴路轉，多得禾夫斯堡最後兩週輸晒，法蘭克福去到煞科日重上第7，至少有得踢下屆歐協聯附加賽，如果再贏埋德國盃，則更可以再進一級踢歐霸盃。

唔少評論認為去到季尾嘅法蘭克福已經放棄聯賽、全力搏德國盃衝番出歐洲。而去到德甲煞科日對弗賴堡嘅比賽尾段，幾乎全季踢3-4-2-1嘅法蘭克福教練Glasner更係將陣型改為4-2-3-1。與其話Glasner貪好意頭想重溫季初主場大炒萊比錫4:0嘅美夢，倒不如話Glasner係怕咗3後衛令後場空間太多，益晒善打高位快攻嘅RB萊比錫。

Glasner早就公佈咗季後離隊，自然想臨走前再擸多個盃，只不過對手RB萊比錫近況奇佳，四至五月嘅聯賽盃賽取得9勝2負佳績，成功從歐霸區嘅第5升番上有得踢歐聯嘅第3。而就算RB剛剛失去咗大腿受傷嘅前鋒André Silva，佢哋都仍然係稍為秤先嘅一方。

預計兩隊正選陣容：

【RB萊比錫】
Blaswich - Henrichs, Klostermann, Orban, Halstenberg - Laimer, A. Haidara - Szoboszlai, Dani Olmo - Werner, Nkunku

【法蘭克福】
Trapp - Buta, Tuta, Ndicka, Max - Rode, Sow - Lindström, Kamada, M. Götze - Kolo Muani

相關內容:

---