22/05/2022 弗賴堡 vs RB萊比錫 - 賽前分析
足球資訊 | 德國本土盃賽 | 發布日期: 22/05/2022
排名: 德甲(5) vs 德甲(4)
球賽方向: 弗賴堡 讓球 [0/+0.5]
RB萊比錫一直俾國內外球迷掛上「金錢足球」嘅帽子，事實上隊中一班核心例如門神兼隊長古拉施斯、前鋒尤素夫保臣、科斯貝治，以至中堅韋利柯賓都已經喺RB征戰多年，幫球隊keep到一定嘅隊型同埋風格。數到德國盃嘅話，RB更已經係近4屆第3次殺入決賽。前兩次決賽遇著老手拜仁、多蒙特都輸鑊金，今屆首次要對牌面較弱嘅對手，爭冠動力自然更大。
話弗賴堡「異軍突起」嘅話恐怕唔會係好貼切，打從教練史迪治，以至陣中基科、基斯甸根達、賀夫拿、尼斯比達臣幾位主力都已係服務多年嘅老臣子，當中嘅防中賀夫拿、左翼衛基斯甸根達更早喺09年已經幫弗賴堡U19贏過青年軍德國盃，當時嘅教練亦就係現時一隊嘅教頭史迪治。所以可以話弗賴堡呢種家庭式經營模式經過多年深耕細作後開始交出成績，今季最終雖然「只係」聯賽排第6出戰歐霸，睇番個積分榜就會明，佢哋只係比第4名嘅RB少3分，聯賽兩次對賽更係同樣打成1:1平手。
講番臨場安排，弗賴堡可以full team排出較慣用嘅三後衛陣式。至於RB方面，今季打起嘅克羅地亞後衛格維迪奧爾因傷錯過兩場聯賽，今晚佢嘅正選位置亦都由較多踢盃賽嘅施馬根取代。中場方面左路安祖利奴只能留在後備席，由守強過攻嘅侯斯頓保頂上，攻中亦都寧願起用年紀較大但經驗較老到嘅科斯貝治伙拍尼干古，呢套人腳似係穩陣至上。
此外亦要留意番，場波喺哈化柏林主場上演，個場前日先啱啱舉行過哈化對漢堡嘅附加賽，睇嚟草皮狀況唔係咁好，隔兩日再上演大戰而個場又未恢復得切嘅話將會對球員臨場發揮有一定影響。
相關內容:
24/05/2024
11/08/2023
04/06/2023 RB萊比錫 vs 法蘭克福 - 賽前分析
02/06/2023
22/05/2022 弗賴堡 vs RB萊比錫 - 賽前分析
22/05/2022