德國老牌球隊凱沙羅頓上一次踢甲組已係12年前嘅事，及後曾接連喺2014、2015年嘅德國盃與利華古遜碰頭，兩次都要踢到加時各贏一次。今季利華古遜威盡德甲，雖然啱啱喺歐霸盃決賽俾阿特蘭大破金身，但凱沙羅頓不論牌面與及近況都係唔多好，呢支乙組下游會戰甲組冠軍依然會係一次越級挑戰。

擁有豐富德甲（例如法蘭克福、德素多夫）經驗嘅老牌教練芬基二月先至接管凱沙羅頓救火，直至尾二一輪確認護級，年屆七張嘅芬基終於可以舒一口氣宣佈完季即走，今場德國盃決賽將會係佢呢次短暫嘅凱沙之旅嘅尾聲。今季德國盃多支甲組隊提早落馬，凱沙羅頓可算係其中一個受益者，佢哋從第二圈起嘅4場對手之中就有兩隊係乙組，僅有嘅甲組對手亦只係今季要直降嘅科隆，四強對手更只係丙組神奇部隊沙貝魯根，嚟緊決賽要對利華古遜先至算得上係全程嘅唯一一次要打大佬。凱沙羅頓平時要踢晒聯賽盃賽、慕遜加柏後衛N.艾維迪嘅孖生兄弟J.艾維迪（Jan Elvedi）因傷缺席德乙收官戰，平時屬於「盃賽先發」嘅後衛艾馬美托尼（Almamy Touré）結果「頂更」領紅，好彩停賽範圍唔包括德國盃，至於J.艾維迪則估計有機會趕及復出。更大一個問號偏偏出現喺隊中身價最高、曾代表法蘭克福踢過德甲同歐霸嘅神射手艾治（Ragnar Ache）身上，艾治現時嘅傷仍有待觀察，教練芬基暫時都未係好肯定艾治能否披甲上陣。

另一方面，今季德國盃少咗甲組隊同樣減輕咗利華古遜嘅晉級負擔，佢哋要去到八強先至首次迎戰甲組隊，即與史特加合演一場公認係「決賽提前上映」嘅精彩大戰，利華喺90分鐘射入嘅奠勝球依家睇番亦已變成今季嘅家常便飯。利華古遜今期行程極為頻撲，佢哋星期三喺都柏林踢完歐霸盃決賽後唔會返回大本營，而係直飛柏林準備呢場決賽。利華古遜今場最大敵人應該就係自己，佢哋喺歐霸決賽完全俾阿特蘭大嘅中場逼搶輾壓，無疑凱沙羅頓人腳級數冇可能奢求佢哋複製同一踢法，但利華自身嘅疲憊、錯失今季首場盃賽決賽嘅失落會否影響到今場嘅表現，則需要等睇最終正選陣容先至見得到端倪。

 

預計兩隊正選陣容：

【凱沙羅頓】
Krahl - Toure, Tomiak, J.Elvedi - J.Zimmer, Kaloc, Raschl, Puchacz - Ritter, Redondo - Hanslik

【利華古遜】
Kovar - Kossounou, Tah, Tapsoba - Frimpong, Andrich, Xhaka, Grimaldo - Hofmann, Boniface, Wirtz

相關內容:

---