今季歐霸盃嘅數據預測長期都係指向利物浦、利華古遜會師都柏林踢決賽。令到「雙利大戰」未能成事嘅主因，就係意甲奇兵阿特蘭大喺八強階段送走咗正值傷兵滿營嘅利物浦。阿特蘭大嘅意大利土炮球員就只有中堅史卡雲尼（Giorgio Scalvini）屬於必然國腳，中後場反而係由荷蘭嘅迪魯恩（Marten de Roon）、高文拿斯（Teun Koopmeiners），以至阿爾巴尼亞隊長迪占士堤（Berat Djimsiti）撐起，呢幾位如無意外都會喺歐國盃決賽週亮相，整體實力不容忽視。

阿特蘭大實戰上比較大嘅顧慮係直到近期仍需要三線全力作戰：除咗上星期嘅意大利盃決賽惡鬥祖雲達斯僅負0:1，歐霸決賽後仍需要為保住意甲第5嘅歐聯出線資格而努力。上週日作客萊切，阿特蘭大稍作輪換以2:0取勝，季初從利華轉投過嚟嘅荷蘭U21左中場巴卡（Mitchel Bakker）罕有亮相15分鐘，話唔定臨場需要靠佢手上嘅情報做應變。教練加斯柏連尼較早前承認今年嘅陣容最實際只係爭取意大利盃，而歐霸盃呢條路全因先後遇到士砵亭、利物浦、馬賽令自身升呢。所以既然殺得入決賽，雙方都已經係咁高咁大，正如前年阿特蘭大歐霸十六強雙殺利華古遜，教咗阿特蘭大8季嘅加斯柏連尼都應該知道呢啲威水史已經不能作準。

利華古遜今季嘅「90+」入球模式令各隊聞風喪膽，有時計牌面對手未必輸蝕得晒，只係利華古遜就算落後都可以全場keep住不慌不忙按自己打法尋找機會，令一啲諗住守到完場嘅對手嘗盡苦頭。利華上季歐霸四強喺羅馬止步，今季再遇成功復仇之餘，喺出硬線嘅情況下由借將史坦尼錫（Josip Stanisic）再次使出一招「90+7」保住今季不敗招牌，就係以沉著態度彌補番聯賽得米後嘅狀態起伏不定嘅例子。去到上星期，今季表現最為搶鏡嘅荷蘭翼衛費林邦（Jeremie Frimpong）一如所料啟動離隊條款招攬買家。用阿Q精神去諗，提前放風俾球隊上下多幾日消化事件都係好事。由沙比阿朗素帶領嘅教練團隊喺調節隊波方面算已經做得好好，就算上星期六聯賽贏波捧碟嘅慶祝活動亦睇嚟係點到即止，都相信隊波可以喺決賽時以full team+最佳狀態示人。

筆者建議今次開波前要先望清楚個正選名單。阿特蘭大門將梅素（Juan Musso）自季中開始改為專責踢歐霸盃，除此以外阿特蘭大因應歐霸盃而喺聯賽做嘅輪換幅度相比利華古遜細得多，但去到上星期場意甲都出現咗唔少變動。利華古遜開季時踢歐霸盃、德國盃肯放新人落場，及後隨著聯賽冠軍提前到手，自八強起變成主力應付歐霸、新仔多啲參與聯賽，但都冇影響到陣中二號門將馬迪哥華（Matej Kovar）嘅盃賽正選位置。利華古遜接下來四日內要踢兩場決賽，一號門將兼隊長夏迪奇（Lukas Hradecky）已放聲氣想爭取最少負責一場決賽，今場沙比阿朗素會沿用馬迪哥華抑或相信經驗名氣用番隊長就值得留意。

相關內容:

---