羅馬、利華古遜上兩次對賽都屬於歐聯嘅分組賽戲碼，時至今日兩隊喺歐霸相遇。羅馬上季憑住新開嘅歐協聯贏到首個歐洲錦標，聯賽開季出閘脫腳嘅利華古遜就本來矢志衝番上歐聯區，只可惜啱啱俾死敵科隆壞咗大計，來季最樂觀都只能係繼續參加歐霸盃。

上季名教頭Mourinho帶領羅馬勇奪首屆歐協聯獎盃，今季歐霸亦高歌猛進，八強重遇上屆歐協聯決賽對手飛燕諾，首回合作客先輸0:1，次回合主場踢到89分鐘先至由後備入替嘅Dybala射成2:1得以進入加時，羅馬最終喺加時階段入多兩球再贏飛燕諾一次。聯賽方面羅馬近期比較失威，排名由第4滑落到第7，不過fans一於少理，歐霸四強首回合嘅主場賽事門票，喺上星期開售4個鐘後就已經賣出超過6萬張。羅馬球迷自然希望球隊可以連續兩年贏歐洲大賽錦標，而羅馬今次主場出擊嘅最大隱憂出現喺後防，英格蘭中堅Smalling自八強後已經因傷缺席咗兩場意甲，最近兩場亦只能坐足全場後備席，眼白白睇住球隊主場輸俾國際米蘭。

利華古遜今季喺歐聯分組賽，僅以較佳對賽成績壓住馬德里體育會獲得B組第三名，得以轉戰歐霸。歐霸路上除咗第一輪要面對法甲摩納哥之外，其餘對手都係名氣較低，打到嚟四強對著羅馬，更係避過晒意甲排名更高嘅祖雲達斯與及稱得上係歐霸霸主嘅西維爾，相信利華上下都會認為羅馬已係最好打嘅對手。較為可惜係利華喺賽前嘅德甲聯賽輸俾死敵科隆，打斷咗14場不敗嘅氣勢之餘，再進一步重返歐聯區嘅希望亦都接近幻滅，與此同時亦都拋唔甩後面嘅禾夫斯堡、緬恩斯，利華古遜喺餘下嘅3場德甲再有乜嘢差錯隨時就變成兩手空空。利華防中、中堅兩邊走嘅Andrich輸俾科隆之後嬲爆，話班球員個心一早已經飛咗去羅馬。