主隊近況：DDWWD

客隊近況：DDDWL

對賽往績：西維爾 勝(1) - 和(0) - 羅馬 勝(0)

---

話說歐霸盃只係舉辦咗13屆，西維爾就已經4次打入決賽兼4次贏晒冠軍，歐霸盃有「西維爾盃」呢個花名實在不難理解。今次西維爾第5度殺入決賽，對手羅馬直至上季先至藉新開嘅歐協聯贏取首個歐洲大賽冠軍，兩隊喺歐洲賽場僅有嘅交鋒紀錄出現喺疫情籠罩嘅3年前，當時佢哋嘅歐霸十六強改踢德國中立場一鋪定勝負，西維爾輕取2:0之餘，及後亦贏埋第4次歐霸冠軍。

Mendilibar教波教咗近30年，託西維爾嘅福，嚟到62歲終於首次帶隊踢決賽。話說3月Mendilibar入嚟西維爾本應只係為咗救亡，點知接手直至上星期面對皇家馬德里先至出現聯賽第2場輸波，歐霸盃更係先後淘汰曼聯、祖雲達斯進入決賽，延續西維爾踢歐霸既有嘅霸氣。儘管世界盃冠軍左閘Acuña需要停賽，Mendilibar都好搞笑咁話：「既然西維爾成日入決賽，你就當我哋係熱門啦。」西維爾聯賽成績處於近年最低位，但如果「按慣例」贏取歐霸盃，來季就仍有會參加歐聯。

西維爾嘅對手羅馬喺出征之前，作客排名更低嘅費倫天拿輸1:2，已經冇可能循聯賽出戰下季歐聯，但假如歐霸盃冠軍到手就唔同講法。教練Mourinho有歐戰5入決賽5次贏盃嘅光榮紀錄，帶領波圖年代更試過兩季先後贏晒歐協、歐聯，所以對於呢位霸氣教練嚟講，要帶同一隊波接連贏兩個歐洲大賽冠軍並唔係非常任務。今場羅馬齊腳，但要留意佢哋喺意甲自4月中主場贏烏甸尼斯之後就冇再贏過波，而近個半月僅有嘅兩場勝仗則係歐霸八強次回合贏咗飛燕諾與及四強首回合贏利華古遜。

預計兩隊正選陣容：

【西維爾】
Bono - Jesus Navas, Badé, Gudelj, Alex Telles - Rakitic - Fernando, Oliver - Ocampos, En-Nesyri, Bryan

【羅馬】
Rui Patricio - Mancini, Smalling, Llorente - Zalewski, Cristante, Matic, Spinazzola - Dybala, Lo. Pellegrini - Abraham