德甲新球季以超級盃作序幕，戲碼同往年一樣由德甲冠軍拜仁慕尼黑對德國盃冠軍RB萊比錫。去年拜仁作客仍然大勝5:3，如今兩隊分別面對陣容不完整、默契成疑等問題，戰情發展好視乎臨場發揮。

拜仁慕尼黑一心諗住大破慳囊從熱刺引入哈利卡尼（Harry Kane），換嚟嘅係熱刺班主大玩拖字訣，到拜仁meet到目標價，又輪到卡尼本人似乎唔多願走。咁問題嚟喇：上屆超級盃有波入嘅文尼（Sadio Mané）已經轉投中東，哈利卡尼又落空，買人Plan B又未起動，咁唔通又玩無鋒陣？呢頭正中鋒冇著落，另一邊後防又火燒後欄：長抖半年有多嘅門神紐亞（Manuel Neuer）臨開咧又走咗去做手術，上季臨時買入嘅桑馬（Yann Sommer）已經遠走國際米蘭，一隊只剩低烏列治（Sven Ulreich）一個選擇。拜仁斟基爾獲加（Kyle Walker）勢將泡湯之餘，同時間柏華特（Benjamin Pavard）又同曼聯眉來眼去，新加盟嘅金玟哉隨時要當後防大佬咁用。

客隊RB萊比錫亦出現大量未知數，佢哋賣出多位主將，幾位新簽嘅球員大有機會要即時擔正。幾日前RB主場約戰拉斯彭馬斯，雖然新兵奧賓達（Loïs Openda）、錫斯高（Benjamin Sesko）即刻合力射入3球，但考慮到對手只係西甲新升班，單憑呢場波就話RB已經夾得好好就未免過於武斷。