歐國聯休息四個月後重新開波，展開八強嘅兩回合賽事。首回合我哋先講講其中一組世界前十嘅matchup：意大利對德國。

意大利同德國正喺世界排名第九、第十之間呢個關鍵位爭持，唔好以為呢個僅係個心理關口，事實上增加到有48隊玩嘅2026世界盃會有成12個分組咁多，扣除美、墨、加三個主辦國（三國現時排名分別為16、19、31），餘下九組嘅種子隊席位就會由抽籤前嘅世界頭九名所瓜分。意大利近一年一直徘徊喺九、十名，而德國自2024歐國盃以八強身分完成賽事後排名持續回升，呢一round八強如果德國過到意大利，世界排名就會超越對方，長遠將有助避免世界盃分組賽再抽中同剋星墨西哥同組。

德國爭出線嘅決心毋庸置疑，奈何現時陣容實在太慘不忍睹：龍門位達史迪根位都未坐暖就已經重創，然後輪到「假9」夏維斯報銷，最近就連喺EURO開始上位嘅穫斯都受傷，後兩者係德國自前鋒富高洛長抖以嚟嘅入球同助攻泉源，剩低嘅拜仁慕尼黑雙子梅斯亞拉（Jamal Musiala）、甘美治（Joshua Kimmich）將要承受更大壓力。教練拿高士文順應民意向今期當紅嘅緬恩斯埋手，分別重召闊別國家隊四年嘅攻中阿美利（Nadiem Amiri）及繼續call前鋒貝卡特（Jonathan Burkardt）跟隊，但考慮到兩人喺國家隊資歷尚淺，以中鋒位置為例，如無意外都係先起用經驗僅比貝卡特多三數場嘅安達夫（Deniz Undav）叩關。

意大利喺歐國盃十六強出局後搵史巴列堤帶隊，史巴列堤用死一套3-5-2看似唔識變通但勝在有貨交，喺歐國聯分組賽階段就已先後作客贏過法國、比利時。意大利呢套3-5-2唔止陣勢、就連人選都幾乎場場一模一樣，不過呢套winning XI今期暫時未能合體：早前已因停賽、傷患缺席三場歐國聯分組賽嘅前鋒羅倫素柏歷堅尼，上星期日因病錯過意甲之餘亦冇入選意軍名單，同時左中場迪馬高亦因傷落選。剩低落嚟嘅意大利正選，中、前場主力都係經驗算唔上豐富，但類似組合夾得多，陣容完整程度、合拍程度都應會好過客隊德國，其中中、前場球員法迪斯（Davide Frattesi）、甘比亞素（Andrea Cambiaso）、利迪基（Mateo Retegui）都有入球能力，得分點夠晒平均。（德國隊X圖片）