德國今期陣容超殘，繼門神位置未坐暖就重傷嘅達史迪根，備戰歐國聯之前再有「假9」夏維斯以至新晉中場猛人梅斯亞拉因傷未有入隊，好彩係上場作客波斯尼亞未算受到考驗，面對教練（巴巴拉斯）、前鋒（迪斯高）都係德甲過來人嘅主隊都能夠以2:1勝出，喺A3組暫時可以2勝1和得7分領前。僅得5次代表大國腳經驗嘅史特加前鋒安達夫（Deniz Undav）繼上回合作客荷蘭開齋後今場入夠兩球，同球隊嘅融合進度理想，加上又喺荷蘭身上取得過入球，今場有主場之利理應更有信心。

A3組緊隨德國之後嘅荷蘭上場作客匈牙利只能賽和1:1，預計今場會繼續利用快攻同多踢邊路創造機會。踢阿積士嘅前鋒布羅比（Brian Brobbey）同安達夫一樣都只係得5頂cap帽，仍未取得入球，但上回合對德國以正選姿態取得一次助攻，反觀同場另一國家隊新丁舒克斯（Joshua Zirkzee）就只能坐足全場，可見布羅比喺隊內嘅競爭稍佔上風，今場又睇吓能否再次把握機會爭取表現。