想當年2022年F1新例（原定2021年執行）樣辦車面世嗰陣，銀色流線型係幾咁搶鏡矚目。到今次FIA推出2026年版本，一架啲藍色深沉到幾乎乜細位都睇唔到嘅樣辦車（而且只係得圖片）睇到筆者都呆咗，感覺就似時光倒流？新車車殼各隊仍可以喺規定嘅尺寸內游走，到2026見到實物再評論未遲，至於新車設定嘅幾個大方向，就可以趁F1仲放緊暑假多講幾句，等大家有啲心理準備。

最大嘅變動自然要數到成副PU（動力單元），2026年廢除MGU-H（熱能回收裝置）嘅PU喺ICE（內燃機）維持1.6升V6渦輪之下通過降低燃油流量限制減細功率，同時間MGU-K（動能回收裝置）就喺電容不變嘅情況下將功率大幅提升兩倍去到350kW，換句話講2026混能PU會做到油、電輸出成50:50嘅均勢。因為要確保電池平均地釋放能量，新規例規定當賽車速度去到290km/h對上時電池輸出會由350kW減到落100kW。喺呢個背景下，本來係會出現「跑到大直路尾反而會慢咗」嘅「奇景」，於是新例又引入咗「override mode」，喺需要扒頭時確保架車夠力衝埋落去。

新例暫時帶來嘅迴響主要係擔心居多，甚至有聲音表示擔心新車會「慢過F2」。除咗上面提到大直路尾有機會唔夠力嘅動力系統配置，新例引入本來係禁止嘅主動式空氣動力系統（active aerodynamics）亦都被認為係新車「弱化」之後嘅「補鑊」舉措。2026新車active aerodynamics將同時適用於頭、尾翼，簡單嚟講就係賽車只要進入特定區域就可以整平頭、尾翼，煞車時又自動降番對翼落嚟增加番下壓力（同時意味住變形尾翼DRS將會完成歷史任務），但與此同時，新一代較窄身嘅底盤估計又會比現時俾少咗三成下壓力。難怪行家都問：做乜要將部新車整到咁雞？

正面啲睇，2026年F1新制喺可持續發展、提升安全性都有著墨，例如終於可以幫架車瘦身、引入E100可持續燃料（有關F1燃料發展可以睇番呢篇）、取消MGU-H精簡賽車設計降低新車隊入場門檻等等，呢啲位相信大家都舉腳贊成，但同時都係帶嚟唔少問號：例如新車目標係整體減重30公斤，而新PU據估計就已經重咗30公斤，一來一回即係賽車設計師要喺其他位偷到60公斤先至夠數。參考2022年轉賽制嘅車重限制搞到隊隊叫晒救命嘅往事，60公斤會係一個大數目嚟，嚟緊又要睇吓各大車隊點樣做取捨與及有啲乜嘢天才嘅設計去「走法律罅」。