09/04/2023 利物浦 vs 阿仙奴 - 賽前分析

足球資訊 | 英格蘭超級足球聯賽(2022/23) | 發布日期: 09/04/2023

排名: 利物浦(8) vs 阿仙奴(1)

利物浦雖然近況疲弱，連續三場作客都未能打開勝局，但主場仍然氣勢強勁，今季只係10月份輸過一場俾列斯聯，主場得勝率僅次於阿仙奴，曼城同曼聯排第四。而近九場聯賽阿仙奴作客晏飛路都未贏過，對上一次袋走3分已經係2012，當時Arteta仲喺陣中。賽前Klopp就大讚阿仙奴，認為Arteta用幾年時間建立球隊，成績有目共睹，球員表現及戰術運用出色，場上亦盡顯動力同激情。

利物浦名宿Carragher話而家嘅阿仙奴，就好似四年前嘅利物浦咁，充滿活力同爭勝心。雖然晏飛路主場氣勢好強，但阿仙奴今季作客成績亦唔嘢少，除咗係今季聯賽作客王，而聯賽12場不失球中，有9場係作客。上場對列斯聯，養傷幾個月復出嘅Jesus表現突出兼入咗2球。當初佢受傷，大家都擔心會影響阿仙奴嘅攻擊力，結果Nketiah頂上，再加上幾個攻擊球員嘅配合，成功保住榜首位置。爭標形勢仍然嚴峻，Jesus 嘅復出極為重要，佢走位靈活，往往能夠用技術拉開對手，為隊友製造空位，亦會喺中前場做串連，踢法有啲似利物浦嘅Firmino。

輸比曼城之後，Klopp好唔滿意球隊嘅表現，更表示陣中只有四位球員發揮正常，之後對車路士就一囗氣換咗六個正選，佢解釋話係因為九日內踢三埸，所以球員需要休息。對車路士雖然悶和0:0，Klopp認為球隊已經有所進步。過去幾季，就算有跌watt嘅時間，利物浦陣中總會有一兩個球員挺身而出一個救全家，今季呢個角色就由門將Alisson代替以往嘅Salah。Alisson今季屢救險球，喺聯賽已經作岀85次撲救，打破自己喺利物浦嘅聯賽單季紀錄。所謂弱隊出鋼門，其實都能反映今季利物浦嘅防守係幾不濟，難怪上場對車路士，Klopp少有地對兩閘同中堅都作出調動。

Arteta透路會有傷兵復出，外界認為係兩個背傷嘅球員Nketiah或者Saliba，而Saka上場身體抱恙只列作後備，今場預計會正選上陣。利物浦就有病癒嘅van Dijk，另外因傷缺陣個近兩月嘅Thiago亦已正式復操，今仗有望披甲。

分類:

足球資訊

09/04/2023 利物浦 vs 阿仙奴 - 賽前分析

分類:

標籤:

關於我們:

快速連結:

聯絡我們: