04/02/2023 愛華頓 vs 阿仙奴 - 賽前分析

足球資訊 | 英格蘭超級足球聯賽(2022/23) | 發布日期: 04/02/2023

排名: 愛華頓 (19) vs 阿仙奴 (1)

阿仙奴同愛華頓，一隊榜首一隊榜尾(二)，兩隊喺今個轉會窗，都有注入新元素，令呢場有啲睇頭。陷入降班漩渦嘅愛華頓雖然冇新球員，但就有新領隊：佢哋搵嚟有豐富經驗嘅前般尼領隊Sean Dyche幫手護級。而阿仙奴呢個轉會窗雖然唔算活躍，但喺最後一日引入車路士嘅Jorginho就令人矚目。英超成立以來，只有六隊喺從未降過班，愛華頓係其中一隊。佢哋近兩季主場對阿仙奴都贏波，如果今場贏埋，就係45年以來首次。不過佢哋正值1994年以來嘅最低潮期，所有賽事10場，只2和8負，而連續4場主場輸波，亦係1958年以來最差嘅主場成績。面對信心爆棚嘅榜首球隊，Dyche護級嘅第一步並唔容易。

愛華頓喺冬季轉會窗有出冇入，賣走咗主力Gordon比紐卡素，球迷對此好不滿。領隊Dyche就為球隊解釋，佢哋有努力搵新球員，但都無功而還，球隊有好多高質素球員，佢會用新踢法，給予球員新視野，同球場上嘅自由度。Dyche喺般尼九季半，雖然喺14-15球季曾經降班，但就迅速返回英超，仲喺17-18球季得到歐洲賽資格。佢嘅首要任務，相信係改善球隊攻力。愛華頓踢咗20場只係入咗15球，入球數字排聯賽尾二。大家會期待佢將般尼嗰套熱血足球帶到愛華頓，以4-4-2陣式，Calvert-Lewin搭Maupay，簡單而直接嘅高空攻勢去提升戰鬥力。

阿仙奴今個轉會窗有Trossard (白禮頓)、Kiwior (史柏斯亞) 同車路士嘅Jorginho加盟。Jorginho同車路士嘅合約只剩餘六個月，所以轉會費只係1200萬鎊。隨著球隊高價簽下Enzo Fernández，Jorginho上陣嘅機會亦會更少，轉會亦係一條出路。Arteta其實早喺2018年，當曼城助教時，已經心儀Jorginbo。2020亦嘗試將Jorginho帶到酋長球場，可惜都唔成功。阿仙奴嘅中場本來已經少替補球員，Elneny剛膝蓋嚴重受傷，Partey亦傷咗肋骨，阿仙奴曾經想引入白禮頓嘅Caicedo但無法達成轉會協議，最後搵咗Jorginho。Arteta口中嘅Jorginho有智慧又有領導才能，佢嘅豐富爭標經驗，將可以幫助一衆年青球員面對壓力。Jorginho今季喺攔截﹑搶回控球權數字上，比Partey突出，而且擅長控制比賽節奏。阿仙奴嘅人腳充滿衝勁同活力，但就欠缺呢類可以穩定戰局嘅球員，呢位新兵，好可能就係爭冠嘅最後一塊拼圖。

分類:

足球資訊

04/02/2023 愛華頓 vs 阿仙奴 - 賽前分析

分類:

標籤:

關於我們:

快速連結:

聯絡我們: